धनुषाधाममा शिक्षामा जोड : मेयर मण्डलद्धारा नयाँ विद्यालय भवन शिलान्यास

न्यूज ब्यूरो, धनुषा । धनुषाको धनुषाधाम नगरपालिकामा नयाँ विद्यालयको भवन शिलान्यास गरिएको छ ।

धनुषाधाम–५ दक्षिणवारी टोल नौसय बिघामा बजंरग अधारभूत विद्यालयको भवन शिलान्यास गरिएको हो । विद्यालयको पहुँचबाट टाढा रहेको यस क्षेत्रमा हाल प्रावि तहको नयाँ विद्यालय निर्माण गर्न लागिएको हो ।

आइतबार नगरप्रमुख बालेश्वर मण्डल, उपप्रमुख विद्या देवि भुजेल र वडाध्यक्ष इन्द्रकुमार महतो संयुक्त रुपमा नयाँ भवनको शिलान्यास गरेका छन् । शिलान्यास गर्दै मेयर मण्डलले नगरको टोलटोलमा शिक्षाको पहुँच बढाउन शिक्षालाई विशेष प्राथमिकतामा राखेर यसतर्फ अग्रसर भएको बताए ।

‘मेरो सपना छ धनुषाधाम नगरपालिका एक नमूना बनोस्, शिक्षित बनोस्, समृद्ध बनोस् । त्यसैलाई आत्मसात गरेर काम गर्दैछु,’ उनले भने, ‘यो मेरो एउटा अभियान झैँ हो । विश्वास छ, पूरा हुन्छ ।’

अल्पसंख्यक, सीमान्तकृत समुदाय अहिलेको समयमा पनि विद्यालयको पहुँचभन्दा बाहिरै रहेको भन्दै यस्ता वर्गलाई लक्षित गरेर काम गरिरहेको उनले बताए । त्यहाँ विद्यालय सञ्चालनमा आइसकेपछि बालबालिकाहरु शिक्षाबाट वञ्चित नहुने आशा उनले लिए ।

यस्तै, उपप्रमुख भुजेलले गाउँ समाजमा छोरीलाई हेर्ने नजरिया अझ बद्लिन नसकेको भन्दै शिक्षित भएपछि आफै समाज परिवर्तणको दिशामा अगाडी बढ्ने विश्वास लिइन् । उनले कसैलाई शिक्षा पाउनबाट वञ्चित नगर्न आग्रह पनि गरिन् ।

वडाध्यक्ष महतोले यस क्षेत्रमा जनघनत्व अत्यधिक भएपनि विद्यालय नहुँदा बालबालिका शिक्षाको घामबाट बाहिरै रहनुपरेको परिस्थितीलाई हटाउन नगरपालिकाले देखाएको तादरुकताप्रति आभार प्रकट गरे । उनले स्थानीय स्तरबाटै समाजिक रुपान्तरण सम्भव रहेको र समाजिक रुपान्तरणको लागि शिक्षा जरुरी रहेको भन्दै आफूले यसका लागि अहोरात्र काम गरिरहेको बताए ।

विद्यालयको नयाँ भवन निर्माणको ठेक्का रोयल निर्माण सेवालाई परेको छ । निर्माण कम्पनीका अध्यक्ष लक्ष्मी साहले निर्धारित समयमै काम सकाउने गरी काम थालेको जनाए ।