मधेशको आवाज नसुनेको भन्दै राष्ट्रिय मिडियाको विरोध

न्यूज ब्यूरो, जनकपुरधाम । मधेशसँग अन्याय हुँदा पनि नबोलेको भन्दै विद्यार्थी जनमत संघले विभिन्न राष्ट्रिय मिडियाको विरोध गरेको छ ।

संघले विभिन्न राष्ट्रिय मिडिया तथा पत्रपत्रिकाको नाम सादा पानामा कालो अक्षरले लेखी जलाएर विरोध गरेको हो । मधेशी समुदायलाई अपमानित गरेको कृषि टिभीविरुद्ध संघले घोषणा गरेको संघर्षका कार्यक्रम अन्तर्गत आज आठौं दिन राष्ट्रिय मिडियाको विरोध गरिएको हो ।

मधेशीलाई अपमान र बेइज्जत गरेको कृषि टिभीलाई कारवाही हुनुपर्ने माग गर्दै संघले पाँच दिने विरोधका कार्यक्रम घोषणा गरेको थियो । तर, सो अवधिमा कारवाही नभएपछि संघले निरन्तर आठ दिनदेखि संघर्षका कार्यक्रम जारी राखेको छ ।

मधेशले आफ्नो पहिचान र स्वाभिमान रक्षाका लागि गरिरहेको संघर्षमा समेत राष्ट्रिय मिडियाले नहेरेको भन्दै कागजमा नाम लेखेर जलाएको संघले जनाएको छ ।

काठमाडौं केन्द्रित मिडियाहरुले मधेशको आवाज दबाएर राख्दै आएको छ ।