जनता भोकै र उपचार नपाएरै मर्दैछन्, सरकारलाई कुकर्मबाटै फुर्सद छैन : अरगरिया

न्यूज ब्यूरो, जनकपुरधाम । जनता समाजवादी पार्टीका सांसद उमाशंकर अरगरियाले भोक र उपचार नपाएर जनता मर्नु देशको लागि लज्जादस्पद विषय भएको बताएका छन् ।

सरकारले भोकले अब कोहि पनि मर्न नपर्ने भनेर पटकपटक भन्दै आएपनि देशका नागरिक भोकै मर्नु परेको भन्दै उनले दुःख व्यक्त गरेका हुन् । उनले आज (बुधबार) उपचार नपाएर र भोककै कारण ज्यान गुमाएका धनुषाका विरेन्द्र यादवप्रति श्रद्धाञ्जलीसमेत अर्पन गरे ।

रेडियो धनुषको बहस विषेश कार्यक्रम ‘मधेश मन्थन’मा कार्यक्रम प्रस्तोता मुकेश ठाकुरसँग कुराकानीका क्रममा उनले जनताले उपचार नपाएर र भोककै कारणले ज्यान गुमाउनु सरकारको लागि हस्यास्पद र लज्जाको विषय भएको बताए ।

सरकार गफ र भाषणमा मात्रै सीमित भएको आरोप उनको छ । देशमा कोरोनाले भयावह रुप लिँदै गएपनि सरकार कुकर्ममै लागेको उनले टिप्पनी गरे ।

कुराकानीको क्रममा उनले सरकारले नयाँ नक्साका लागि गर्न लागेको संविधान संशोधनमा मधेशको माग पनि सँगै समेट्नुपर्ने माग गरेका छन् । अर्को प्रसंगमा उनले मधेशीको अपमान र बेइज्जती गरेकाहरुविरुद्धको उजुरी प्रहरीले नलिएकोप्रति अपत्तिसमेत जनाए ।

उनले सरकारको मौनता र सरकारी निकायकै बदमासीका कारण मधेशीले अपमानित जिन्दगी जिउनु परिरहेको भन्दै यसका लागि आफूले संसदमा आवाज उठाउनेसमेत बताए ।