कृषि टिभी प्रकरण : कालो अक्षरमा प्रेस काउन्सिल लेखेर विरोध

न्यूज ब्यूरो, जनकपुरधाम । जनमत पार्टी निकट विद्यार्थी जनमत संघका युवाहरुले आज कृषि टिभीविरुद्धको विरोधका कार्यक्रम अन्तर्गत कालो अक्षरमा प्रेस काउन्सिल लेखेर फेसबुकमा पोष्ट गरेका छन् ।

संघले कृषि टिभीविरुद्ध घोषणा गरेको विरोधका कार्यक्रम तहत आज कालो अक्षरमा प्रेस काउन्सिल लेखेर विरोध गरेको हो । मधेशी समुदायलाई अपमानित गरेको कृषि टिभीविरुद्ध संघले लगातार तीन दिनदेखि विरोधका कार्यक्रम जारी राखेको छ ।

प्रेस काउन्सिलले कृषि टिभीलाई स्पष्टिकरण सोधपनि कारवाहीको लागि कुनै किसिमका कदम चालेको छैन । संघले विरोधका कार्यक्रम अन्तर्गत बिहीबार पहिलो दिन कृषि टिभीको कार्टुन बनाएर विरोध गरेको थियो भने शुक्रबार सबैले आफ्नो प्रोफाइलमा कालो तस्वीर राखेका थिए ।

संघले विरोधका कार्यक्रम अन्तर्गत भोली आइतबार चौथो दिन इमेलमार्फत प्रेस काउन्सिलमा ध्यानाकर्षणपत्र बुझाउने र पाँचौं दिन सादा पानामा प्रेस काउन्सिल लेखेर घरमै बसी जलाउने जनाएको छ ।

पाँचौं दिनसम्म कारबाही नभए विरोधका थप कार्यक्रम सार्वजनिक गर्ने संघका अध्यक्ष पोषण यादवले बताए ।