'आलम' को घरमा प्रहरीको छापा, अवस्था बिग्रेपछि १२ राउण्ड फायर !

न्यूज ब्यूरो, रौतहट । रौतहट जिल्लाको राजपुर बमकाण्डका अभियुक्त पूर्वमन्त्री आफताब आलमको घरमा रौतहट प्रहरीले खानतलासी गरेको छ।

बमकाण्डका अर्को फरार अभियुक्त मन्त्री आलमको भाइ महताब आलमलाई पक्राउ गर्न प्रहरीले बिहीबार राति १२ बजे राजपुरमा रहेको आलमको घरमा सर्च अप्रेशन चलाएको हो।

‘बमकाण्डका फरार अभियुक्त महताब आलम घरमा रहेको गोप्य सूचना पाएपछि मन्त्री आलमको घरमा प्रहरी पुगेको जिल्ला प्रहरी कार्यालय रौतहटका प्रमुख उपरक्षक रविराज खडकाले बताए ।

फरार रहेका आलमका भाइलाई पक्रन प्रहरी पुगेको र खानतलासीका क्रममा परिवारजन र स्थानीयले प्रहरीलाई अवरोध र जाइ लाग्न थालेपछि प्रहरीले आत्म रक्षाको लागि हवाई फायर समेत गरेको उपरिक्षक खडकाले बताए ।

यस्तो छ आलम प्रकरण

अभियुक्त पक्राउ गर्न गएको प्रहरीमाथि हातपात हुन खोजेपछि १२ राउण्ड गोली हवाइ फायर गरेको प्रहरी उपरीक्षक खड्काले प्रष्ट पारे।खडकाले घरमा महताब आलम फेला नपरेको बताए उनले भने ‘फरार रहेका सबैको खोजी कार्य जारी छ ।’

राजपुर बमकाण्ड घटनाका आरोपी मोहम्मद महताब आलम, मोहम्मद मोबिन आलम, शेख भदई, शेख सेराज, शेख फजले हक, सगिर आलम, शेख मलकार, बद्री सहनी, मुक्ति साह लयायतका व्यक्ति प्रहरीको फरार सूचीमा रहेका छन् ।

२०६४ चैत्र २७ गते राजपुर फरहदवामा रहेको नेपाली कागें्रसका पूर्वमन्त्री शेख इद्रिसको घरमा बम विस्फोट हुँदा दर्जनौंको मृत्यु भएको थियो ।

पहिलो संविधान सभा निर्वाचनको पूर्वसन्ध्यामा भएको सो विस्फोटमा परी मृत्यु भएका र घाइते भएकाहरुलाई नजिकैको इँटा भट्टामा लगेर पोलेको आरोप आलममाथि लागेको छ ।

सरुअठाका २४ वर्षका त्रिलोकप्रताप सिंह र २२ वर्षका ओसी अख्तरको मृत्यु भएको भन्दै दुवै जनाको परिवारका सदस्य श्रीनारायण सिंह र रोक्साना खातुनले मोहम्द आफताब आलम, महताब आलम, मोविन आलम, शेख भदई र शेख सरोज विरुद्ध किटानी जाहेरी दिएपछि आलमको अपराध बारे केरकार शुरु भएको हो ।

जाहेरी दिएको १२ वर्षपछि प्रहरीले रौतहट क्षेत्र नं. २ का सासंद तथा पूर्व मन्त्री मोह्मद आफताब आलमलाई २०७६ असोज २६ गते इद्रिस गेट अगाडिबाट प्रक्राउ गरेको थियो ।

आलमलाई बमबारुद बनाउने तथा विस्फोटनसम्बन्धी कसुर र घटनाका जीवित घाइतेको बयानका आधारमा ज्यान मार्ने मुद्दा समेतको अभियोगमा जिल्ला अदालत रौतहटले २०७६ कात्तिक २९ मा पुर्पक्षको लागि कारागार चलान गरेपछि उनी हाल उनी काठमाडौंको नख्खु कारागारमा छन् ।

२०६५ असार ३० गते महान्यायाधीवक्ताको कार्यालय मार्फत जिल्ला सरकारी कार्यालय रौतहटले अनुसन्धान प्रतिवदेन हेरेर मुद्दा नचलाउने निर्णय गरेको थियो ।

२०६९ जेष्ठ १४ तत्कालिन न्यायाधीश शुशीला कार्कीको इजलासले जघन्य अपराधमा छानबिन गरेर मुद्दा चालाउने आधार हुँदा हुँदै अनुसन्धान नगरेकोमा सुरुबाट अनुसन्धान गर्न जिल्ला प्रहरी कार्यालय रौतहटलाई आदेश दिएको थियो ।

सर्वोच्चको आदेश पालना नगरेको भन्दै घटनाका पीडित परिवारले अदालतको मानहानी भएको भन्दै पुन: सर्वोच्चमा निवदेन दिएका थिए ।