मधेश सरकारले भन्यो–'मधेशीलाई होच्याउनेलाई तुरुन्त कारवाही गर'

न्यूज ब्यूरो, जनकपुरधाम । गत जेठ १ गते काठमान्डौंको एक टिभीमा मधेशी मूलका नेपालीलाई होच्याएको तथा अपमानजनक भाषाहरु प्रयोग गरिएको भन्दै कारवाहीको माग गरिएको छ ।

प्रदेश नं. २ का सरकारले मधेशी उपर अपशब्द तथा अपमानजनक शब्द प्रयोग गर्ने टिभी प्रस्तोताहरु सहित टिभीलाई पनि कारवाहीको माग गरिएको हो ।

प्रदेश नं. २ का मुख्यन्यायधिवक्ता दीपेन्द्र झाले मधेशी समुदाय उपर अपशब्द र अपमाजनक भाषा प्रयोग गरिएको भन्दै कारवाहीको लागि सूचना तथा प्रविधि मन्त्रालयसँग माग गरेको छ ।

कृषि टिभी नेपाल नामक टेलिभिजनबाट नियमित सञ्चालन भइरहेको “कोरोना बिर्साउने गफगाफ” कार्यक्रमको मिति २०७७।०२।०१ गते प्रशारण भएको इपिसोडमा प्रयोग गरिएको शब्द तथा सांकेतिक हाउभाउले मधेशीबर्गको खिल्ली उडाएको तथा मधेशी समुदायलाई अपमानित गरेको भनी बिभिन्न सामाजिक सञ्जालमा जनताको प्रतिक्रिया, सञ्चार माध्यमहरुमा प्रकाशित लेख तथा जनताले गरेको गुनासोबाट गम्भिर ध्यानाकार्षण भएको निवेदनमा उल्लेख छ ।

निवेदनमा स्वतन्त्राताको हक सम्बन्धी व्यवस्था भएको नेपालको संविधानको धारा १७ को उपधारा (२) को प्रतिबन्धात्मक बाक्याँश १ र समानताको हक सम्बन्धी व्यवस्था भएको धारा १८ को उपधारा (२) र (३) मा समेत कुनै पनि वर्ग समुदायबीच प्रत्यक्ष, अप्रत्यक्ष वा सांकेतिक रुपमा भेदभाब नगरिने कुरा उल्लेख भएको भन्दै कारवाहीको माग गरिएको हो ।

“त्यस्तै मुलुकी फौजदारी संहिता, २०७४ को राज्य बिरुद्धका कसूर अन्तर्गत दफा ४९ (४) विभिन्न जातजाति वा सम्प्रदायबीचको सुसम्बन्ध खलल गर्नु वा गराउनु हुँदैन भन्ने उल्लेख भएको भन्दै सोही ऐनको सार्वजनिक शान्ति विरुद्धको कसूर अन्तर्गत दफा ६५ (१) मा कसैले लेखेर, वचनले वा आकार वा चिन्हद्वारा वा अरु कुनै किसिमबाट धर्म, वर्ग, जातजाति, सम्प्रदाय वा भाषाको आधारमा नेपालको विभिन्न वर्ग, क्षेत्र वा समुदायका व्यक्तिहरुका बीचको सुसम्बन्धमा खलल पार्ने काम गर्न हुँदैन” भन्ने व्यवस्था गरेको देखिन्छ ।– निवेदनमा उल्लेख छ ।

टेलिभिजनक कार्यक्रमहरुः कोरोना बिर्साउने गफगाफ, व्हाट द फ्लोप, जोगिन्दर बोले प्रणाम जी तथा केही नेपाली चलचित्रहरु सिमित व्यक्तिहरुको रमाइलो तथा मनोरञ्जनका लागि मधेशीलाई बिभिन्न तरिका होच्याउने, अपमान गर्ने, तल देखाउने, बेइज्जत गर्ने जस्ता कार्यहरु गरेको भन्दै यथाशिघ्र कारवाहीको माग गरिएको छ ।