सिरहामा ९ दिनदेखि वेपत्ता पुरुष मृत फेला

न्यूज ब्यूरो, सिरहा । सिरहामा ९ दिनअघि वेपत्ता भएका एक पुरुष मृत अवस्थामा भेटिएका छन् ।

मिर्चैया नगरपालिका–५ का ३५ वर्षीय संजित यादवको शव झण्डै ९ दिनपछि फेला परेको हो । उनी गत २९ गते दिउँसो घरबाट खाजा खाएर निस्किएका थिए ।

उनको शव मंगलबार साँझ मिर्चैया नगरपालिका–५ स्थित इमली डाँडा भन्ने ठाउँमा कुहिएको अवस्थामा फेला परेको प्रहरीले जनाएको छ । गोठालाहरुले शव देखेपछि प्रहरीलाई खबर गरेको थियो ।

शव हिजै भेटिएपनि उठाएर ल्याउन सक्ने अवस्थामा नरहेका कारण अहिले प्रहरी चिकित्सकको टोलीसहित घटनास्थल पुगेको छ । शव परीक्षणका लागि रामकुमार सारडा उमाप्रसाद मुरारका स्मारक अस्पताल लहानबाट चिकित्सक बोलाइएको छ ।

परीक्षण रिपोर्ट आएपछि मात्रै घटना बारे केहि भन्न सकिने ईलाका प्रहरी कार्यालय मिर्चैयाका प्रहरी नायव उपरीक्षक (डिएसपी) सन्तुप्रसाद जैसवारले बताए ।

पारिवारिक श्रोतका अनुसार, पछिल्लो समय उनी ऋणको चापका कारण तनावमा थिए । केहि समय शिक्षण पेशामा समेत काम गरेका उनी पछिल्लो वर्ष कृषि क्षेत्र तिर लागेका थिए । तर, त्यसमा समेट अपेक्षित आमदानी हुन नसकेर घाटा व्यहोर्नु परेपछि तनावमा परेर विष खाएर आत्महत्या गरेको हुनसक्ने अनुमान गरिएको छ ।

सामाजिक सञ्जालमा निकै सक्रिय संजित क्रान्तिकारी स्वभावका थिए । घटनाको विषयमा थप अनुसन्धान भइरहेको प्रहरीले जनाएको छ ।