ओलीलाई दुबै पदबाट राजीनामा गराउने प्रस्ताव

न्यूज ब्यूरो, काठमाडौं । स्थायी समिति बैठकमा साझा धारणा र वैकल्पिक प्रस्ताव पेस गर्न भन्दै जुटेका सत्तारुढ नेकपाका दोस्रो तहका नेताहरुबीच आफैँमा मतभेद चर्किएको छ ।

वैशाख १० गते स्थायी समिति बैठकको माग गरेर हस्ताक्षर बुझाउने २० जनामध्ये १९ जना ललितपुरको झम्सीखेलमा मंगलबार छलफलमा जुटेका थिए ।

तर, प्रधानमन्त्री केपी शर्मा ओलीको राजीनामाका विषयमा नेताहरु तीन समूहमा बाँडिएपछि साझा धारणा बनाउने प्रयास असफल भएको सहभागी एक नेताले जानकारी दिए ।

ओलीलाई दुई पदमध्ये एकबाट राजीनामा गराउने, दुवै पदबाट राजीनामा गराउने र अहिलेलाई ओलीकै नेतृत्वमा एक भएर अघि बढ्ने गरी तीनथरीका विचार भेलामा आएका थिए । भेलामा सहभागी भएका नेतासमक्ष स्थायी समिति सदस्य भीम रावलले १७ पृष्ठ लामो प्रस्ताव पेस गरेका थिए ।

सरकारले ल्याएको दुई वटा विवादास्पद अध्यादेशले पार्टीलाई पारेको असर, सरकारको नेतृत्वमा रहेर प्रधानमन्त्री ओलीबाट भएका गलत निर्णयले सरकार र पार्टीको नेतृत्व गर्ने क्षमता ओलीमा नदेखिएको हुँदा दुवै पदबाट राजीनामा माग गर्नुपर्ने रावलको प्रस्ताव थियो ।

तर, सो प्रस्तावमा नेताहरु सहमत हुन सकेनन् । २० जनाबीचमा साझा धारणा नबनेपछि नेताहरुले छुट्टाछुट्टै आफ्नो धारणा राख्ने तयारी गरेका छन् ।