धनुषाधाम नगरपालिकाद्धारा रेडियो मार्फत एसईई परीक्षाको तयारी

न्यूज ब्यूरो, जनकपुरधाम । ऐतिहासिक एवम पर्यटकीय स्थल मानिने धनुषाको धनुषाधाम नगरपालिकाले एसईईका परीक्षार्थीहरुलाई रेडियो मार्फत तयारी कक्षा सँचालन गरेको छ ।

धनुषाधामबाट सँचालित रेडियो धनुष एफएम ९९.७ मेगाहर्जबाट नगरपालिकाले कुशल शिक्षकहरुद्धारा एसईई परीक्षाको तयारी सुरु गराएको नगर प्रमुख बालेश्व मण्डलले बताए ।

मण्डलका अनुसार, सरकारले गरेको लकडाउनका कारण घरमै बस्न बाध्य भएका एसईईका परीक्षार्थीहरुलाई केन्द्रीत गर्दै उनीहरुलाई रेडियो मार्फत तयारी कक्षा सुचारु गरेको हो ।

लकडाउनभन्दा केही दिनअघि मात्र परीक्षाको एक दिन अगावै मात्र अर्थात पूर्वसँध्यामै परीक्षा स्थगितको सूचना आएको थियो । त्यसपछि निरन्तर चल्दै आएको लकडाउनका कारण अध्ययन प्रभावित भएको भन्दै सो कक्षा सँचालन गरिएको हो ।

नगरपालिकाका प्रमुख प्रशासकीय अधिकृत गणेशराज कार्कीका अनुसार नेपाल सरकारको परिपत्र र नगरको शिक्षा स्तरलाई वृद्धि गर्ने हेतु तत्काले रेडियो मार्फत परीक्षाको तयारी सुरु गरिएको हो ।

नगरभित्रका परीक्षार्थीहरुको तथ्याँक सँकलन गरी कार्यक्रमको समयमा रेडियो मार्फत परीक्षाको तयारी गर्न भनिएको अधिकृत कार्कीले बताए ।

एसईई परीक्षा तयारीको लागि ७ जना दिग्गज शिक्षकहरु राखिएको हो । जसमा नेपाली, अँग्रेजी, विज्ञान, दुवै गणित र समाजिक विषयलाई केन्द्रीत गरिएको बताउनुभयो ।

नगर शिक्षा समितिको समन्वयमा रेडियो कार्यक्रम शिक्षित धनुषाधाम सँचालन गरिएको हो । लकडाउन खुलेपछि केही दिनमै परीक्षा सँचालन हुने भएपछि उनीहरुको ध्यानलाई केन्द्रीत गर्न समेत रेडियो मार्फत अध्ययन अध्यापन सुरु गरिएको अधिकृत कार्कीले बताए ।

रेडियो मार्फत तयारी कक्षा सँचालन भएपछि एक महिनामा परीक्षालाई केन्द्रीत गरी सिकाइने गरिएको जनाइएको छ । रेडियो कक्षाबाट नगरका परीक्षार्थीहरु लाभान्वित हुने विश्वास गरिएको छ ।

नगरभित्रको विभिन्न माध्यमिक विद्यालयको शिक्षकहरुबाट तयारी कक्षा सुरु गरिएको हो ।