५ करोड बढीको लागतमा 'नगर प्रशासकीय भवन ' बन्दै

न्यूज ब्यूरो, जनकपुरधाम । जिल्लाको पूर्वी क्षेत्र कमला नगरपालिकाको नगर प्रशासकीय भवनको एक कार्यक्रमबीच आज (सोमबार) शिलान्यास गरिएको छ ।

कमला नगरपालिकाका मेयर राम उदगार गोईत र उपमेयर शिला देवी मण्डलले सँयुक्त रुपमा भवनको शिलान्यास गरेका छन् ।

वर्तमान कमला नगरपालिकाको कार्यालय रहेको माचि झिटकैया स्थित विद्यालय परिसरमै नगर प्रशासकीय भवनको शिलान्यास गरिएको हो । विद्यालयको अर्को भवन नगरपालिकादेखि करिब १५० मिटरको दुरीमा निर्माणधिन रहेको छ ।

भवनको लागि ५ करोड ६३ लाख ५१ हजार ९ सय ९२ रुपैयाँ बजेट विनियोजन गरिएको हो । १८ महिनामै सम्पन्न गरिसक्नुपर्ने गरी वल्ड वाइड आई एस एन जेबी निर्माण कम्पनीले ठेक्का लिएका हुन् ।

उक्त रकममा नगर प्रशासकिय भवनको लागि ३ तल्ले भवन र कर्मचारी क्वारटरको लागि अढाई तल्ले भवन सहित बाउण्ड्री वाल (पर्खाल) निर्माण गर्नुपर्ने प्रमुख प्रशासकीय अधिकृत विरेन्द्र सढानले जानकारी दिए ।

सोमबार दिउँसो नगर प्रमुख गोईतले पूजाआजा गरी भवनको शिलान्यास गरेका छन् । शिलान्यास कार्यक्रममा नगरपालिकाका प्रमुख प्रशासकीय अधिकृत विरेन्द्र सढान, योजना शाखा अधिकृत चन्द्रप्रकाश यादव सहित ९ वटै वडाका वडाध्यक्षहरुको सहभागीता रहेको थियो ।

शिलान्यासको क्रममा सुरक्षाकर्मी, स्थानीय समाजसेवीहरु समेत उपस्थिति जनाएका थिए । नगरपालिकाको लािग सुविधा सम्पन्न भवन निर्माण हुने भएपछि स्थानीयहरु समेत खुसी भएका छन् ।

अहिले अस्थायी टहरामा नगरपालिकाको काम कारवाही सँचालन हुँदै आएको छ ।