धनुषामा सालीसँग विहे गर्न श्रीमतीको हत्या, खाल्डोमा भेटियो शव

न्यूज ब्यूरो, जनकपुरधाम । धनुषामा एकजना श्रीमानले श्रीमतिको हत्या गरेर जंगलमा गाडेको शव चार दिनपछि भेटिएको छ ।

मिथिला नगरपालिका ९ लालभिट्टीका हरि चौहानले आफ्नै श्रीमती वीणा चौहान लामाको हत्या गरेका हुन् । हत्या गरेर सामुदायिक वनमा श्रीमतीको शव गाड्ने चौहान पक्राउ परेका छन् ।

सालीसँग दोस्रो विवाह गर्नका लागि चौहानले पत्नीको हत्या गरेको खुलेको छ । चौहानले श्रीमतीलाई लालगढ सामुदायिक वनस्थित मगर्नी खोलामा घुमाउन लैजाने बहानामा हत्या गरेको प्रहरी अनुसन्धानबाट खुलेको हो ।

वीणा हराएको भन्दै उनका पिताले हुलियासहितको निवेदन दिएपछि प्रहरीले खोजी सुरु गरेको थियो ।

अनुसन्धानकै क्रममा उनका पति हरिलाई नियन्त्रणमा लिएपछि हत्या गरेर गाडिएको जानकारी आएको ढल्केबरका प्रहरी निरीक्षक तीर्थ कार्कीले जानकारी दिए ।

उनको बयानका आधारमा शव निकालेर पोष्टमार्टमका लागि प्रादेशिक अस्पताल जनकपुरधाम पुर्याएको र हरीलाई जिल्ला अदालतबाट म्याद थप गरी अनुसन्धान थालिएको प्रहरीले जनाएको छ ।

हरिले ५ वर्षअघि वीणासँग प्रेम विवाह गरेका थिए । यी दुवैको १ छोरा र १ छोरी समेत छन् । तर यो बीचमा हरिले वीणाकी कान्छी बहिनीसँग पनि प्रेम सुरु गरेका थिए । वीणालाई साइड लगाएर मात्रै हरिले सालीसँग विवाह गर्न लागेका थिए ।

प्रहरीले घट्ना सम्बन्धमा थप अनुसन्धान भइरहेको जनाएको छ ।