प्रदेश २ः मेयर र ५ वडाध्यक्ष सहित ७ जना पक्राउ !

न्यूज ब्यूरो, जनकपुरधाम । गरिब र विपन्नलाई राहतमा कुहिएको दाल बाँडिएको आरोपमा मेयर सहित ७ जनालाई प्रहरीले पक्राउ गरेको छ ।

प्रदेश नं. २ को बारा जिल्लाको कलैया उपमहानगरपालिकाका मेयर, वडाध्यक्षहरु सहित सचिवलाई समेत पक्राउ गरिएको बारा प्रहरीले जनाएको छ ।

न्यूज ब्यूरोसँग कुराकानी गर्दै बारा प्रहरीका प्रहरी प्रमुखले मेयर राजेश राय यादव सहित ५ जना वडाध्यक्ष र २ जना सचिवलाई नियन्त्रणमा लिएको बताउनुभयो ।

मेयर यादव सहित प्रहरीले अनुसन्धानका लागि भन्दै वडा नं. १३ का वडाध्यक्ष राजन प्रसाद कुर्मि, वडा नं. २६ का वडाध्यक्ष महेश साह, वडा नं. ११ का वडाध्यक्ष सर्वुनारायण चौधरीलाई , कलैया–१ का वडाध्यक्ष हरिओम साह र वडा नं. ७ का अध्यक्ष सर्फुल्लाह अन्सारीलाई पक्राउ हो ।

यसका साथै, प्रहरीले कलैया–२० का वडा सचिव खेदु मियाँ, कुहिएको दाल बिक्री गर्ने यादव आईस एण्ड कोल्ड स्टोरका कर्मचारी कृष्णप्रसाद यादव र कोल्डस्टोरमा दाल स्टोर गर्ने उद्योगी तेजकरण जैनलाई पनि पक्राउ गरि अनुसन्धान गरिरहेको छ ।

पक्राउ परेकामध्ये जैनलाई काठमाण्डौ किर्तिपुरबाट र अन्य सवैलाई बाराबाटै नियन्त्रणमा लिएको प्रहरीले जनाएको छ ।

कलैया उपमहानगरपालिकाले लकडाउनको समयमा आफ्ना विपन्न असाहय जनताका लागि राहत वितरण गर्ने क्रममा कलैया उपमहानगरपालिकाका नगरप्रमुख राजेशराय यादवको कोल्डस्टोरबाट कुहिएको दाल खरिद गरी विक्री वितरण गरेको गुनासो आएपछि बारा प्रहरीले उक्त दाल नियन्त्रणमा लिएको थियो ।

नियन्त्रणमा लिएको दाल बसतपुर चौकीमा राखिएको छ भने दाल खरिद गरिएको मेयर यादवको कोल्ड स्टोरमा भएको दाललाई समेत प्रशासनले शिल गरी नमूना परिक्षणका लागि हेटौडा पठाएको थियो ।

हेटौडा स्थित खाद्य प्रविधि तथा गुण नियन्त्रण कार्यालयले उक्त दाल हरु ‘अनिवार्य गुणस्तर अनुरुप नपाईएको’ भन्दै बारा प्रहरीलाई पत्र पठाएको थियो ।

राहतमा वितरण गरिएको दाल गुणस्तरहीन पाईएपछि प्रहरीले अनुसन्धान शुरु गरेको थियो ।

अनुसन्धानका क्रममा उद्योगी तेजकरण जैनले मेयर यादवको कोल्ड स्टोरमा पशु आहारका निमित्त प्रयोग हुने किरा लागेको दाल राखेको स्वीकारे । उक्त दाल भण्डारण गरे वापत उद्योगी जैनले कोल्डस्टोरलाई शुल्क बुझाउदै आएको उद्योगी जैनका छोरा निशान्त जैनले बताए ।

‘खाद्य सामाग्रीको स्टोर गर्दा ५–७ महिना मात्र गर्ने हो, हामीले त्यो पशु आहारका लागि भनि विगत ४ वर्ष देखि उक्त कोल्ड स्टोरमा रहरको दाल र केही दाना स्टोर गरेको हो’ जैनले भने ।

आफुहरुले कोल्ड स्टोरमा भण्डारण गरेको मात्र हो, दाल विक्री गरेका छैनौं जैनले भने, ‘हामीले मिडियाबाट थाहा पाए लगत्तै बारा प्रशासनलाई जानकारी समेत गराएका छौं’ ।

अनुसन्धान सकिएपछि सरकारी वकिल मार्फत उक्त प्रतिवेदन प्रमुख जिल्ला अधिकारीलाई बुझाईने समेत प्रहरीले जनाएको छ ।