प्रहरीले कार्यशैली सुधार्नुपर्छ : आयोग

न्यूज ब्यूरो, काठमाडौं । लकडाउन पालना गराउने नाममा भएको कुटपिटले स्वास्थ्यकर्मीको मनोबल गिर्ने अवस्था सिर्जना भएको भन्दै राष्ट्रिय मानव अधिकार आयोगले चिन्ता व्यक्त गरेको छ ।

गत बुधबार ड्युटी सकेर फर्किँदै गरेका त्रिभुवन विश्वविद्यालय शिक्षण अस्पताल, महाराजगञ्जका चिकित्सकत्रय डा. शम्भु खनाल, डा. तेजप्रकाश शर्मा र डा. विकास शाहमाथि प्रहरीले कुटपिट गरेको थियो । घटनालगत्तै विभिन्न पेसागत संगठनसँग मिलेर अनुगमन गरेको आयोगले चिकित्सकमाथि दुर्व्यवहार भएको निष्कर्ष निकालेको हो ।

आयोगका अनुसार, सुनसरीमा पनि स्वास्थ्यकर्मीमाथि प्रहरीद्वारा कुटपिट भएको छ । प्रहरीका एकपछि अर्का यस्ता हर्कतले स्वास्थ्यकर्मीको मनोबल खस्किने अवस्था सिर्जना भएको भन्दै आयोगले कार्यशैली सुधार्न प्रहरीलाई आग्रह गरेको छ ।

औषधि खरिददेखि अन्य अत्यावश्यक प्रयोजनका लागि घरबाट निस्किएका सर्वसाधारणमाथि पनि दुर्व्यवहार भएको आयोगले बताएको छ ।