सिरहामा प्रहरीको लाठी प्रहारबाट एकजनाको आँखाको नसा नै फाट्यो

न्यूज ब्यूरो, सिरहा । लकडाउन पालना गराउन भन्दै ड्युटीमा खटेका प्रहरीको लाठी प्रहारबाट सिरहामा एकजनाको आँखामा गम्भीर चोट लागेको छ ।

सिरहा नगरपालिका १७ स्थित पटेर्वाका एकजनाको ईलाका प्रहरी कार्यालय माडरका प्रहरी प्रमुख कृष्ण यादवले प्रहार गरेको लाठीले गम्भीर क्षति पुगेको हो । लाठी प्रहारबाट स्थानीय घुरन मुखियाको दायाँ आँखाको नसा नै फाटेको छ ।

गत सोमबार आफ्नै घर अगाडि साग बेचिरहेको अवस्थामा प्रहरीले एक्कासी लाठी प्रहार गरेको पीडित मुखियाले बताए । लाठी प्रहारकै क्रममा ईप्रकाका प्रमुख यादव स्वयम्ले हिर्काएको लाठीले आफ्नो आँखामा चोट लागेको उनले जनाए ।

आँखामा गम्भीर चोट लागेपछि उपचार गराउन सागरमाथा आँखा अस्पताल लहान पुगेका मुखियालाई त्यहाँका डाक्टरले आँखाको नसा फाटेको बताए । उपचार गर्न ८–१० दिन ढिला हुने भन्दै काठमाडौं गएर उपचार गराउन सल्लाह दिएर आँखाको सामान्य उपचार गररे मुखियालाई घर फर्काई दिएका छन् ।

आँखाको बाहिरी भागमा घाउ भएको र घाउ निको नभएसम्म भित्रि भागको उपचार गर्न सम्भव छैन्, उपचारपछि पनि मुखियाले आँखा देख्न सक्ने वा सक्ने यसको ठोकुवा गर्न नसकिने कुरा डाक्टरलाई उदृत गर्दै पीडित मुखियाले जानकारी गराए ।

दैनिक ज्यालादारी गर्ने मुखियालाई आँखा उपचार गराउन आर्थिक संकट समेत परेको छ ।