डाक्टर कुटने डिएसपी जिम्मेवारीबाट हटाइए, फेरी एक डाक्टर कुटिए

न्यूज ब्यूरो, जनकपुरधाम । डयुटि सकेर घर फर्कदै गरेका डाक्टर उपर दुरव्यवहार सहित कुटपिट गर्ने घटनाका डिएसपी जिम्मेवारीबाट हटाइएको छ ।

बुधबार (हिजो) साँझ महाराजगंजमा डाक्टरलाई कुटपिट भएपछि महानगरीय प्रहरी वृत महाराजगंजका प्रमुख डिएसपी उमेश लम्साललाई महानगरीय प्रहरी आयुक्तको कार्यालय, रानीपोखरी (मेट्रो)मा झिकाइएको छ।

महानगरीय प्रहरी कार्यालय रानी पोखरी काठमान्डौले जारी गरेको प्रेस विज्ञप्तिमा लम्साललाई प्रमुखको जिम्मेवारीबाट हटाइएको उल्लेख गरिएको छ ।

बुधबार साँझ ड्युटी सकेर घर फर्केने क्रममा त्रिवि शिक्षण अस्पताल र कान्ति बाल अस्पतालका डाक्टरहरु शम्भू खनाल, तेजप्रकाश साह र विकास साहलाई लकडाउन उल्लंघन गरेको भन्दै डिएसपी लम्सालसहितको प्रहरी टोलीले कुटपिट गरेको थियो।

सोही विषयमा थप अनुसन्धान गर्न भन्दै डिएसपी लम्साललाई मेट्रो तानिएको प्रेस विज्ञप्तिमा उल्लेख गरिएको छ ।

‘उक्त घटनामा संलग्न रहेका महानगरीय प्रहरी वृत महाराजगंजका प्रमुख प्र।ना।उ। उमेश लम्साललाई प्रमुखको जिम्मेवारीबाट हटाई यस कार्यालय झिकाइएको साथै उक्त घटनामा संलग्न अन्य प्रहरी कर्मचारीलाई यस कार्यालयमा झिकाई आवश्यक छानबिन कार्य भइरहेको व्यहोरा समेत जानकारी गराइन्छ’, महानगरीय प्रहरी प्रवक्ता प्रहरी वरिष्ठ उपरिक्षक श्यामलाल ज्ञवालीद्वारा जारी विज्ञप्तिमा भनिएको छ।

आज फेरी पनि धरान उपमहानगरपालिका–२० विष्णुपादुका स्वास्थ्य चौकीमा कार्यरत हेल्थ असिस्टे‍न्ट चन्द्रप्रकाश खनाललाई प्रहरीले कुटपिट गरेको छ।

पानमारा चौकीका प्रमुख सई भेषबहादुर राउतले पाईपले कुटपिट गरेको खनालले समाजिक सँजालमा बताएका छन् ।

बिरामीको घरैमा नियमित ड्रेसिङ गर्न जाने क्रममा बिहीबार बिहान कुटपिट भएको उनको भनाइ छ। आफू स्वास्थ्यकर्मी भएको जानकारी गराउँदै परिचयपत्र देखाउँदा समेत प्रहरीले लकडाउनको बेला हिँडेको भन्दै कुटपिट गरेको उनले बताए।

कुटपिटबाट उनको घाटीँ नजिकैको भागमा सुम्ला (दोदरा) बसेको छ। कुटपिट गर्ने प्रहरी राउतले भने आफूबाट त्यस्तो दुर्व्यवहार नभएको दाबी गरेका छन्।

उता धरान प्रहरी प्रमुख डिएसपी ढुन्डिराज न्यौपानेले भने आफूले भर्खर मात्र सूचना पाएको र सत्यतथ्य बुझेर कारबाही प्रक्रिया अगाडि बढाइने बताए।