प्रदेशसभा सदस्यहरू आफनै भाषामा लिए सपथ

जनकपुरधाम, ७ माघ ।
प्रतिनीधि तथा प्रदेश सभा सदस्य निर्वाचनमा निर्वाचित भएका प्रदेश सभा सदस्यहरुले आ आफनै भाषामा सपथ खाएका छन् ।

आईतबार प्रदेश नं. २ को प्रदेश सभाका सदस्यहरुको सपथ ग्रहण समारोहमा निर्वाचित प्रदेश सभा सदस्यहरुले आ आफनै भाषामा सपथ ग्रहण गरेका हुन् ।
२ नम्बर प्रदेशको अस्थायी राजधानी जनकपुरमा सपथ ग्रहण गर्दै प्रदेश सभा सदस्यहरुले आ आफनै भाषाको सपथ पत्रमा हस्ताक्षर समेत गरेका हुन् ।

कतिपय सांसदहरुले नेपाली भाषाको शपथपत्रमा हस्ताक्षर नगर्ने भनेपछि नेपाली सहित मैथिली र भोजपुरी भाषाको सपथपत्रमा हस्ताक्षर गर्न दिइएको थियो ।

आईतबार दिउँसो जनकपुर उद्योग वाणिज्य संघको राजर्षिजनक सभागृहमा प्रदेश सदस्यहरुलाई पद तथा गोपनीयताको सपथग्रहण गराइएको हो ।

प्रदेश सभाका जेष्ठ सदस्य ललन लाल चौधरीलाई प्रदेश प्रमुख रत्नेश्वरलाल कायस्थले सपथग्रहण गराएका हुन् ।

सपथ ग्रहण समारोहमा जेष्ठ सदस्य लगन लाल चौधरीले प्रदेशसभाका अन्य सदस्यहरुलाई पद तथा गोपनीयताको सपथग्रशण गराएका हुन् ।

कति सदस्यले कुन भाषामा सपथ लिए

प्रदेश नं. २ अर्थात ८ वटै जिल्लाका प्रदेशसभाका १०७ सदस्य मध्ये मैथिली भाषामा ४७, नेपाली २४, भोजपुरीमा २५ र हिन्दीमा ११ जनाले सपथ लिएका छन् ।

संविधान र प्रदेशसभा निर्वाचन ऐनअनुसार प्रदेशसभामा निर्वाचित ज्येष्ठ सदस्यलाई प्रदेश प्रमुखले र ज्येष्ठ सदस्यले अन्य सांसदलाई सपथग्रहण गराएका हुन् ।

सरकारले निर्वाचन सम्पन्न भएको डेढ महिनापछि प्रदेशप्रमुख नियुक्त गरेलगत्तै निर्वाचन आयोगले प्रदेशसभाको अन्तिम नतिजा बुझाएको थियो।

आयोगले माघ २४ गते तोकिएको राष्ट्रिय सभा निर्वाचनको कार्यक्रम आइतबारदेखि नै सुरु गरेकाले सबै प्रदेशसभा सदस्यको शपथ आइतबारै गराउनुपरेको हो ।

यता, प्रदेशसभा २ को पहिलो अधिवेशन माघ २१ गतेका लागि तय भएको छ ।