देशका ६३ जिल्लामा र्यापिड टेस्ट सुरु, झण्डै १६ हजारको परीक्षण

न्यूज ब्यूरो, काठमाडौं । सरकारले देशका ६३ जिल्लामा कोरोना भाइरस (कोभिड–१९) संक्रमणको र्यापिड डाइग्नोस्टिक टेस्ट (आरडीटी) सुरु गरिएको जनाएको छ ।

स्वास्थ्य तथा जनसंख्या मन्त्रालयले बुधबार गरेको मिडिया ब्रिफिङमा १४ जिल्लाबाहेक सबै जिल्लामा र्यापिड टेस्ट सुरु गरिएको जानकारी दिएको हो । हालसम्म झण्डै १६ हजार जनाको कोरोना भाइरसको परीक्षण गरिएको मन्त्रालयले जनाएको छ ।

मन्त्रालयका प्रवक्ता डा. विकास देवकोटाका अनुसार, अहिलेसम्म ८९२९ र पीसीआर विधिबाट ६८७१ वटा गरी कुल १५ हजार ८ सय वटा परीक्षण गरिएको हो । पछिल्लो २४ घण्टामा मात्र २८९४ वटा परीक्षण गरिएको छ ।

उनका अनुसार प्रदेश नम्बर १ का ७, प्रदेश २ का ३, कर्णाली प्रदेशमा २ र गण्डकी प्रदेश र पाँच नम्बर प्रदेशमा एक–एक जिल्लामा र्यापिड टेष्टबाट परीक्षण सुरु गर्न बाँकी छ ।

बुधबारसम्म देशभर ५ हजार ६१४ जना क्वारेन्टाइनमा रहेका छन् ।