प्रदेश २ः प्रहरी र स्थानीयबीच झडप, २३ राउण्ड फायर, गाउँलेमा भागाभाग !

न्यूज ब्यूरो, जनकपुरधाम । कोरोनाको सँक्रमण रोकथामको लागि सरकारले लगाएको लकडाउन पालना गराउने क्रममा प्रहरी र स्थानीयबीच झडप भएको छ ।

प्रदेश नं. २ को सिरहा जिल्लाको सिरहा नगरपालिका वडा नं. १७ पटेर्वामा आज बेलुकी प्रहरी र स्थानीयबीच झडप भएको जिल्ला प्रहरी कार्यालय सिरहाले जनाएको छ ।

कोरोनाको महामारीलाई रोक्नको लागि सरकारले लगाएको लकडाउनमा पनि स्थानीयहरु भीड जम्मा गरेको तथा लकडाउन उलंघन गरेको भन्दै प्रहरीले उनीहरुलाई सचेत गराएका थिए ।

सोही क्रममा लकडाउन अटेरी गर्ने क्रममा प्रहरीले स्थानीयहरु उपर लाठीचार्ज गरेपछि स्थानीय र प्रहरीबीच झडप सृजना भएको जिल्ला प्रहरी कार्यालय सिरहाले जनाएको छ ।

झडपमा केहि सुरक्षाकर्मी घाईते भएको प्रदेश प्रहरी कार्यालयका प्रवक्ता तथा एसपी जयराज सापकोटाले जानकारी दिनुभयो ।

लकडाउनको पालना गराउन पुगेका प्रहरीमाथि स्थानीयले जाइलागेपछि झडप भएको बताउँदै उहाँले स्थिति नियन्त्रणमा लिनको लागि प्रहरीले २३ राउण्ड हवाई फाइर गरेको बताउनुभयो ।

एसपी सापकोटाका अनुसार, प्रहरीमाथि आक्रमण गर्नेहरुको खोजी भइरहेको छ । झडपपछि गाउँमा भागाभाग मच्चिएको छ ।

अहिले जिल्ला प्रहरी कार्यालयका डिएसपी विनोद घिमिरे नेतृत्वको टोली थप सुरक्षाबल सहित घटनास्थल पुगेको जनाइएको छ । यसबारे थप विवरण अझै आउन बाँकी छ ।