प्रदेश २ : लकडाउनमै एक युवक मृत फेला, कुकुर टोली परिचालन

न्यूज ब्यूरो, सप्तरी । कोरोनाको महामारीका कारण लकडाउन लगाएको बेला प्रदेश नं. २ को सप्तरीमा एक युवक मृत फेला परेको छ ।

सप्तरीको कँकालिनी नगरपालिकाको भारदह स्थित अन्दाजी बर्ष १९ को एक युवक विहानै मृत फेला परेको सप्तरी प्रहरीका प्रवक्ता एवम् डिएसपी तिलक भारतीले जानकारी दिनुभयो ।

प्रवक्ता भारतीका अनुसार, लकडाउनमा मानिसहरुको आवतजावत नै नभएको खण्डमा युवकको लास भेटाउनु शंकास्पद रहेको बताउनुभयो ।

युवकको लास भेटाएपछि घटना स्थलमा कुकुर टोली समेत परिचालन गरिएको प्रवक्ता भारतीयले न्यूज ब्यूरोसँग भन्नुभयो । “अन्दाजी १८–१९ वर्षका युवक मृत फेला परेको छ, हामी अनुसन्धानमा छौं ।”

युवकलाई मृत देखेपछि कन्ट्रोलमा खवर गरेपछि जिल्ला प्रहरी कार्यालयको कुकुर सहितको टोली घटनास्थल पुगेर अनुसन्धान थालिएको जनाइएको छ ।

मृतकको सनाखत भने हुन बाँकी छ भने उनको मृत्यू कसरी भएको बारे पोष्टमार्टमको रिपोर्ट आएपछि मात्र भन्न सकिने बताइएको छ । घटनाको प्रकृति अनुसार हत्या गरी फालिएको हुन सक्ने अनुमान गरिएको छ ।

मृतकको शवलाई विपी कोइराला स्वास्थ्य विज्ञान प्रतिष्ठान धरानमा पोष्टमार्टमको लागि लैजाने तयारी गरिएको प्रवक्ता भारतीयले बताउनुभयो ।