धनुषामा बन्दुकसहित दुई युवक समातिए

न्यूज ब्यूरो, धनुषा । धनुषामा भरुवा बन्दुकसहित दुई युवक पक्राउ परेका छन् ।

धनुषाको मिथिला नगरपालिकाबाट भरुवा बन्दुक सहित दुईजना पक्राउ परेको धनुषा प्रहरीले जनाएको छ । पक्राउ पर्नेमा मिथिला नगरपालिका ४ पुष्पलपुरका २६ वर्षीय सरोजकुमार महतो र वर्ष ४४ का राजकुमार लामा रहेका छन् ।

आज (आइतबार) दिउँसो अढाई बजे भरुवा बन्दुक बोकेर पुष्पलपुर खोला हुँदै ज १२ प १११५ नम्बरको पल्सर मोटरसाइकलमा दक्षिण तर्फबाट उत्तर तर्फ जाँदै गरेको अवस्थामा दुवैजनालाई पक्राउ गरिएको हो ।

दुबैजनालाई हातहतियार तथा खरखजाना मुद्दामा जिल्ला अदालत धुनषाबाट म्याद थप गरी अनुसन्धान गरिरहेको धनुषाका प्रहरी प्रवक्ता रामेश्वर कार्कीले जानकारी दिए ।