जनकपुरमा पटाखा पड्काउने १४ फन्दामा

न्यूज ब्यूरो, जनकपुरधाम । जनकपुरमा पटाखा पड्काउने १४ जनालाई प्रहरीले पक्राउ गरेको छ ।

धनुषा प्रहरीले जनकपुरको विभिन्न स्थानबाट लकडाउनको उल्लंघन गरी पटाखा पड्काउने कार्यमा संलग्न रहेको अभियोगमा १४ जनालाई आइतबार राति पक्राउ गरेको हो । जिल्ला प्रहरी कार्यालय धनुषाबाट खटिएको प्रहरीले उनीहरुलाई पक्राउ गरेको हो ।

पक्राउ परेका सबैमाथि अनुसन्धान भइरहेको धनुषा प्रहरीले जनाएको छ । भारतीय प्रधानमन्त्री नरेन्द्र मोदीले विश्वभर महामारीको रुपमा फैलिएको कोरोना भाइरसविरुद्ध आफ्ना देशका नागरिकलाई दिपावली गर्न आग्रह गरेका थिए ।

मोदीको अपिल स्वीकार्दै मधेशका अधिकांश जिल्लामा समेत दिपावली गरियो । तर, जनकपुरमा भने दिपावलीसँगै केही युवाहरुले पटाखा पनि पड्काएका थिए ।