महामारीमा पनि करोडौं भ्रष्टाचार गर्ने कमरेडहरूको लाज खोई ? : बाबुराम

न्यूज ब्यूरो, काठमाडौं । पूर्व प्रधानमन्त्री तथा समाजवादी पार्टीका संघीय परिषद् अध्यक्ष डा. बाबुराम भट्टराईले महामारीको बेलामा पनि स्वास्थ्य सामग्री खरिदमा करोडौंको भ्रष्टाचार गर्ने कमरेडहरूको लाज खोई भन्दै प्रश्न गरेका छन् ।

पूर्व प्रधानमन्त्री डा. भट्टराईले एक ट्विट गर्दै यस्तो प्रश्न तेस्र्याएका हुन् । यस्तै उनले मातृभूमि फर्कन ज्यान जोखिममा राखेर नदीमा हाम्फाल्ने नागरिकको तस्बिर राख्दै नागरिक नांगो कि आफ्ना नागरिकको रक्षा गर्न नसक्ने र उल्टै ती नागरिकलाई अपमान गर्दै बजार घुमाउने सरकार नांगो भनेर टिप्पनी गरेका छन् ।

भारतीय क्षेत्र धार्चुलाबाट नेपाल प्रवेश गर्न प्रहरीले नदिएपछि धार्चुलाबाट महाकाली नदीमा हाम्फालेर नेपाल आएका थिए । नांगो अवस्थाका उनलाई प्रहरीले पक्राउ गरेर सहर परिक्रमा गराएको थियो ।