भारतबाट फर्किएका ८ जनालाई सप्तरीको क्वारेन्टाइनमा राखियो

न्यूज ब्यूरो, सप्तरी । भारतको पटनाबाट फर्किएका ८ जनालाई सप्तरीमा क्वारेन्टाइनमा राखिएको छ ।

सुनसरी, सप्तरी र सिरहा जिल्लाबाट भारतको राजधानी नयाँ दिल्लीमा आयोजित मुस्लिम धार्मिक सभामा सहभागी हुन हिँडेका, तर त्यहाँसम्म नपुगी फर्किएका आठ जनालाई सप्तरीको क्वारेन्टाइनमा राखिएको हो । क्वारेन्टाइनमा पाँच जना सुनसरीका, दुई जना सप्तरीका र एक जना सिरहाका छन् ।

दिल्ली जमातमा जान भन्दै पटनासम्म पुगेर फर्केका उनीहरुलाई सप्तरीको बोदे बर्साइन नगरपालिका ५ स्थित चन्द्रा माविको क्वारेन्टाइनमा राखिएको छ । पटना पुगेपछि भारतमा रेल नचल्दा आफूहरु दिल्ली जान नसकेको उनीहरुले बताएका छन् ।

उनीहरु नेपाल फर्किँदा यहाँ पनि लकडाउन लागू भइसकेको थियो । सप्तरीको बेल्ही नाकाबाट नेपाल फर्किने क्रममा प्रहरीले उनीहरुलाई नियन्त्रणमा लिई क्वारेन्टाइनसम्म पुर्याएको हो ।

उनीहरुको अवस्था सामान्य रहेको बताइएको छ ।