लकडाउनमा सिडिओ अफिसले उपलब्ध गराएको सबै 'सवारी पास' रद्द !

न्यूज ब्यूरो, जनकपुरधाम । सरकारले लगाएको लकडाउनको बेला जिल्ला प्रशासन कार्यालय (सिडिओ अफिस) बाट जारी गरिएको सवारी पास रद्द गरिएको छ ।

केन्द्र सरकारको गृह मन्त्रालयको चलानी नम्बर ३४६९ को मिति २०७६ चैत्त १८ गतेको पत्र बमोजिम यसअघि जारी गरिएको सबै सवारी पास रद्द गरिएको उल्लेख गरिएको छ ।

जिल्ला प्रशासन कार्यालय धनुषा सहित अन्य जिल्लाका जिल्ला प्रशासन कार्यालयबाट प्रदान गरिएको सवारी साधनको पास अबदेखि प्रयोग नगरिदिन अनुरोध गरिएको छ ।

विभिन्न अत्याश्वक क्षेत्र बाहेकका सवारी साधनलाई पनि विना पासको आवतजावत गर्ने अनुमति सहित पासको आवश्यकता नपर्ने जिप्रका धनुषाको सूचनामा उल्लेख छ ।

त्यसको लागि एम्बुलेन्स, शव वाहन, दमकल, झण्डावाल सवारी, कुटनितिक उन्मुक्ति तथा सुविधा प्राप्त नियोग, व्यक्ति तथा संघ सँस्थाहरुलाई आवागमन गर्न अनुमति पत्र नचाहिने उल्लेख गरिएको छ ।

यसका साथै, पत्रकारहरुलाई प्रेस पास (रेड कार्ड) प्राप्त सँचारकर्मीहरुलाई पनि सिडिओ अफिसको पासको आवश्यकता नपर्ने तथा लिएका पास प्रयोग अबदेखि नगर्न उल्लेख गरिएको छ ।

स्वास्थ्य सेवामा खटिएका कर्मचारी, चिकित्सक, नर्स, फर्मासिस्ट, प्रयोगशालामा कार्यरत प्राविधिक, अस्पतालमा कार्यरत एवम अन्य कर्मचारी, औषधी उत्पादन ढुवानी र विक्री वितरणमा सँलग्न हुने जनशक्तिहरुलाई पनि पास आवश्यक नपर्ने जनाइएको छ ।

यस्तै, खानेपानीको मर्मत सम्हार र वितरणमा सँलग्न जनशक्ति, फोहोरमैला व्यवस्थापनमा परिचालित जनशक्ति, ठुला खाद्य स्टोरमा कार्यरत जनशक्ति, अत्यावश्यक वस्तु तथा सेवा ढुवानी गर्ने मालबाहक सवारी साधनहरु (अनुसूचि बमोजिमका) लाई आवतजावत गर्न दिने भएको छ ।

सवारी साधन अनुमति पत्र बमोजिम सँचालन भए नभएको सम्बन्धमा जिल्ला प्रशासन तथा सुरक्षा निकायले अनुगमन गर्दा उदेश्य विपरित सवारी साधन सँचालन भएको पाइएमा अनुमति पत्र रद्द गरी प्रचलित कानुन बमोजिम हदै सम्मको कारवाही गरिने चेतावनी दिएको छ ।