जनकपुरमा एउटै मास्क ७५० मा बेच्ने पक्राउ

न्यूज ब्यूरो, जनकपुरधाम । जनकपुरमा मास्क र पञ्जा कालोबजारी गर्ने एकजनालाई प्रहरीले पक्राउ गरेको छ ।

बजार अनुगमनको क्रममा बढी मूल्य लिएर मास्क र पञ्जा बिक्री गरिरहेको पाइएपछि कालोबजारी गर्ने एक व्यवसायीलाई प्रहरीलाई पक्राउ गरेको हो । पक्राउ पर्नेमा जनकपुरधाम–४ स्थित ३६ वर्षीय राजेशकुमार झा रहेको प्रहरीले जनाएको छ ।

प्रादेशिक अस्पताल जनकपुरस्थित बजरंग जेनरल स्टोरमा मास्क प्रतिथान ७५० रुपैयाँ र पञ्जा प्रति पोका पाँच सय रुपैयाँमा बिक्री गरिरहेको अवस्थामा झालाई पक्राउ गरिएको जिल्ला प्रहरी कार्यालय धनुषाका डीएसपी रामेश्वर कार्कीले जानकारी दिए ।

झालाई जिल्ला प्रहरी कार्यालयको हिरासतमा राखेर थप अनुसन्धान भइरहेको उनले जनाए । लकडाउन यता विभिन्न सामानमा कालोबजारी गर्ने १७ जनालाई जनकपुरबाट प्रहरीले पक्राउ गरेको छ ।

लकडाउनसँगै देशभर नै कालोबजारी बढेको छ ।