महेन्द्रनगर बमकाण्ड : विप्लव समूहका थप एक पक्राउ

न्यूज ब्यूरो, धनुषा । धनुषाको क्षीरेश्वरनाथ नगरपलिका ५ महेन्द्रनगरमा भएको बम विस्फोट घटनाको फरार प्रतिवादी थप एकजना पक्राउ परेका छन् ।

महेन्द्रनगर बमकाण्डमा संलग्न रहेका धनुषाधाम नगरपालिका ३ तेजनगरका ३५ वर्षीय गंगा मण्डल पक्राउ परेका हुन् । मण्डललाई बिहीबार दिउँसो प्रदेश प्रहरी कार्यालय र ईलाका प्रहरी कार्यालय धनुषाधामको संयुक्त टोलीले घरबाटै पक्राउ गरेको हो ।

उनी प्रतिबन्धित नेपाल कम्युनिष्ट पार्टी (विप्लव समूह) का कार्यकर्ता रहेको प्रहरीले जनाएको छ । घटना यता उनी लुकीछिपी बस्दै आएका थिए । झण्डै चार महिनापछि पक्राउ परेका मण्डललाई अदालतमा पेश गर्न थप अनुसन्धान भइरहेको ईप्रका धनुषाधामका प्रहरी निरीक्षक सुमन थापाले जानकारी दिए ।

गएको मंसिर २८ गते मध्यराति महेन्द्रनगरस्थित औषधि व्यवसायी राजेश्वर साहको घरमा बम विस्फोट भएको थियो । घटनामा परी घरधनी राजेश साह, उनको छोरा आनन्द साहसहित प्रहरी निरीक्षक अमिर दाहालको ज्यान गएको थियो भने अन्य ६ जना घाइते भएका थिए ।