भ्रामक सूचना सम्प्रेषण गर्नेलाई कडा कारवाही : प्रेस काउन्सिल

न्यूज ब्यूरो, काठमाडौं । विश्वलाई त्रसित बनाएको कोरोना भाइरस (कोभिड–१९) बारे भ्रामक सूचना सम्प्रेषण गर्नेलाई कडा कारवाही गरिने भएको छ ।

कोरोना बारे केही अनलाइन सञ्चारमाध्यमले भ्रामक सूचना तथा समाचार सामग्री सम्प्रेषण गरिएको पाइएको जनाउँदै प्रेस काउन्सिल नेपालले कडा कारवाही गर्ने भएको हो । त्यस्ता अपवाह फैलाउनेलाई कानूनअनुसार कडा कारवाही गर्ने प्रेस काउन्सिलले जनाएको छ ।

काउन्सिलले विज्ञप्ति जारी गरी कोभिड–१९ ले विश्व नै त्रसित भइरहेको र नेपाल सरकारले विभिन्न आदेश जारी गरिसकेको अवस्थामा सूचना तथा प्रशारण विभागमा दर्ता नै नभएका र काउन्सिलमा सूचीकरणका लागि निवेदन नदिएका केही अनलाइनले संवेदनशीलतालाई रमाइलो विषय बनाएर झुटा समाचार सम्प्रेषण गरिरहेको भन्दै यस्तो जनाएको हो ।

केही अनलाइन विदेशमा भएका कोरोना भाइरस सङ्क्रमणका घटनालाई नेपालमै भएको जस्तो गरी शीर्षक राखेर सामग्री राखेको विषय काउन्सिलको स्वअनुगमनबाट देखिन आएको हो । काउन्सिलले आमपत्रकार, सञ्चारकर्मी तथा सामाजिक सञ्जाल प्रयोगकर्तालाई संयमित भएर सूचना तथा समाचार सामग्री सम्प्रेषण गर्न पनि अनुरोध गरेको छ ।