विदेशबाट आएका सबैको लिस्ट तयारी, मेडिकल टिम पठाउने तयारी : गृहमन्त्री यादव

न्यूज ब्यूरो, जनकपुरधाम । प्रदेश नं. २ का आन्तरिक मामिला तथा कानुन मन्त्री ज्ञानेन्द्र कुमार यादवले विदेशबाट आएका सबैको लिस्ट ( नामसूचि) सरकारसँग रहेको बताउनुभएको छ ।

कोरानो सँक्रमणको लागि केन्द्रीय सरकारले चालेको कदम र जारी गरेको आदेशलाई मध्यनजर गर्दै प्रदेश सरकारले समेत आत्मसात गरेको भन्दै कतार एयरवेज सहित अन्य ठाउँबाट नेपाल आएका सबैको नाम सूचि प्रदेश सरकारसँग रहेको बताउनुभएको छ ।

धनुषाको विभिन्न ठाउँका आम नागरिकहरु विदेशबाट आएको र उनीहरुको स्वास्थ्य चेकजाँच नभएको भन्दै गुनासो आएपछि आफूहरु समेत सक्रिय भएको उहाँले बताउनुभएको छ ।

धनुषाको कमला नगरपालिका, हँसपुर नगरपालिका, औरही गाउँपालिका, जनकपुरधाम उपमहानगरपालिकाको विभिन्न वडामा विदेशबाट आएका नागरिकहरुको सूचि तयार पारी राखिएको बताउनुभएको छ ।

उहाँले उनीहरुको पहिचान भईरहेको भन्दै मेडिकल टिम र प्रशासनको टिम पठाउने तयारी भईरहेको बताउनुभएको छ ।

न्यूज ब्यूरोसँग कुराकानी गर्दै मन्त्री यादवले अनावश्यक हल्ला भन्दा पनि विदेशबाट आएका नागरिकहरु उपर सरकारको समेत चासो रहेको बताउनुभएको छ । सबै ठाउँमा प्रशासन र मेडिकल टिम पठाउने तयारी भईरहेको बताउनुभयो ।