लकडाउनमा कालोबजारी : जनकपुरमा ३ पक्राउ

न्यूज ब्यूरो, जनकपुरधाम । सरकारले लागू गरेको लकडाउनको मौका छोपी कालोबजारी गर्ने तीनजना जनकपुरबाट पक्राउ परेका छन् ।

प्रहरीको अनुगमन टोलीले चर्को मूल्यमा आलू र प्याज बेचिरहेका तीनैजनालाई जनकपुरको विभिन्न चोकबाट पक्राउ गरेको हो । पक्राउ पर्नेमा जनकपुरधाम उपमहानगरपालिका ४ वस्ने प्रदिप अग्रवाल, अंकित साह र विकाश कुमार साह रहेका छन् ।

उनीहरुले आलू प्रतिकिलो ५० रुपैयाँ तथा प्याज प्रतिकिलो सय रुपैयाँका दरले बेचिरहेका थिए । बजार अनुगमनको क्रममा विभिन्न चोकमा संचालनमा रहेका पसलहरुमा छापा मार्दा उपभोक्तालाई बढी मूल्यमा आलू र प्याज बेचेको पाइएपछि उनीहरुलाई पक्राउ गरेको जिल्ला प्रहरी कार्यालय धनुषाले जनाएको छ ।

पक्राउ परेका तीनैजना उपर थप अनुसन्धान भइरहेको छ । लकडाउनमा कालोबजारी बढेपछि प्रहरीले निगरानी बढाएको छ ।