सँजय टकलाको बुवा र श्रीमति सहित यी १३ सहयोगीलाई पनि जेल !

न्यूज ब्यूरो, जनकपुरधाम । जेल जीवन विताईरहेका पूर्व राज्यमन्त्री सँजय कुमार साह टकला सहित अन्य १३ जनालाई जेल सजाय तोकेको छ ।

ज्यान मुद्दामा जेलमै रहेका पूर्व साँसद समेत रहेका साह सहित उनका बुवा, श्रीमति, भाई र सहयोगीहरु गरी १३ जनालाई सजाय सुनाएको हो । विशेष अदालतले सम्पत्ति शुद्धिकरण मुद्दामा सजाय तोकेको हो ।

विशेष अदालतले फागुन २९ गते विहिवार गरेको फैसलामा साहलाई ५ वर्ष कैद, उनकी पत्नी रंगीला देवी साहलाई २ वर्ष ६ महिना जेल सजायको फैसला गरेको हो ।

गत विं. सं. २०७४ साल चैत्त १६ गतेमा सम्पत्ति शुद्धिकरण विभागले दर्ता गराएको ०७४–सिआर–०१०२ (075-CR-0102) नम्बरको मुद्दामा विहिबार सुनुवाई गर्दै अन्तिम फैसला गरेको हो । उनीहरुलाई आंशिक ठहर को फैसला सुनाएको विशेष अदातलको मुद्दा फैसला किसीममा उल्लेख गरिएको छ ।

यस्तै, साहका बुवा साधुशरण साह सुडीलाई पनि २ वर्ष ६ महिना जेल र भाई रामकुमार साहलाई १ वर्ष ६ महिनाको कैद सजाय सुनाएको छ । यद्यपी विशेष अदालतले वेभसाईटमा फैसला र आदेशको पूर्ण विवरण समाचार तयार पारुन्जेलसम्म भने अपलोड गरेको छैनन् ।

सँजय साह जेल बाहिर हुँदा साहका राइट ह्याण्ड मानिने तत्कालिन सहयोगीहरु छेदी राउत र सुजीत पाण्डेलाई पनि अढाई÷अढाई वर्ष कैद सजाय सुनाएको छ ।

विशेष अदालतका न्यायाधीश कृष्ण गिरी, शान्तिसिंह थापा र चन्द्रबहादुर सारुको सँयुक्त ईजलासबाट मुद्दाको फैसला दिइएको हो । विशेष अदालतको फाँट “ख” मा सुनुवाई भएको सो मुद्दामा साह सहित १३ जनालाई कसुर ठहर गरी सजाय तोकेको हो ।

विशेष अदालतको परिवार सहितको यस्तो फैसला नेपालकै इतिहासमा सम्वतः पहिलो भएको बुझिएको छ ।

राजनीतिकर्मीको एकै परिवारका दाजुभाई, पिता, पत्नी र सहयोगी समेतलाई अकुत सम्पत्ती राखेको अभियोगमा जेल सजाय गरेको संभतः यो नै पहिलो भनिएको छ ।

सम्पत्ती शुद्धिकरण सम्बन्धी मुद्दाको फैसलामा साह सहितलाई १९ करोड बिगो र उतिकै जरिवानाको फैसला भएको छ ।सम्पत्ती शुद्धिकरण विभागले साहमाथि ३२ करोडको विगो र उतिके जरिवानाको माग गरेको थियो ।

साह बिरुद्ध सम्पत्ती शुद्धिकरण विभागले २०७४ साल चैत १६ गते मुद्दा दायर गरेको थियो ।त्यस अघि नै २०७३ साल पुस २५ गते अख्तियारले भ्रष्टाचार सम्बन्धी मुद्दा दायर गरेको थियो ।

यस अघि फागुन १५ गते विशेष अदालतले उनलाई भ्रष्टाचारी ठहरगर्दै ४ वर्ष कैद सजायको फैसला सुनाएको थियो ।

अख्तियार दुरुपयोग अनुसन्धान आयोगले दायर गरेको मुद्दामा साहलाई भ्रष्टाचारी ठहरगर्दै साढे १९ करोड बिगो र उतिकै जरिवानागरि करिब ३८ करोडको बिगो जफ्त हुने फैसला अदालतले गरेको थियो ।

अख्तियारले साढे ३१ करोड र सम्पत्ती शुद्धिकरणले ३२ करोड सम्पत्तीको स्रोत नखुलेको दावीगर्दै मुद्दा दायर गरेको थियो ।

सो मुद्दामा उनका पिता, पत्नी, भाई र सहयोगीहरुलाई सजाय भएको थिएन् । सम्पत्ती शुद्धिकरणको मुद्दा बाहेकमा साह बाहेकका सदस्यहरुलाई सजाय भएको थिएन् ।

अख्तियारलेपनि उनकी आमा दुलारी देवी सुडी, पिता साधु साह सुडी, पत्नी रंगीला देवी, भाई रामकुमार साह समेतमाथि मुद्दा गरेको थियो ।तर त्यसमा साह बाहेक अन्यलाई सजाय भएको थिएन् ।

साह, उनका पिता साधु साह सुडी, पत्नी रंगीला देवी र भाई रामकुमार साहको नाउँमा रहेका सम्पूर्ण सम्पत्ती रोक्का रहेको छ ।

सञ्चार उद्यमी अरुण कुमार सिंघानियाको हत्या र रामानन्द चोक बम काण्ड मुद्दामा धनुषा जिल्ला अदालतबाट साहलाई जन्मकैदको सजाय भएको छ ।

काठमाण्डु जेलमा रहेका साहका लागि फागुन महिनामा १५ दिन भित्र आएको विशेष अदालतको दुईवटा फैसलाले थप जेल सजाय भएकोछ ।

धनुषा जिल्लाको सहरी निर्वाचन क्षेत्र जनकपुरधामबाट उनी दुवै संविधान सभामा निर्वाचित भएका थिए ।

पहिलो संविधान सभा चुनावमा उनले तत्कालिन नेकपा एमालेका नेता रघुबीर महासेठ र दोस्रो संविधान सभा निर्वाचनमा नेपाली काँग्रेसका उम्मेदवार रामसरोज यादवलाई पराजित गरेका थिए ।

तत्कालिन नेकपा एमालेका नेता माधवकुमार नेपालको सरकारमा सञ्जय साह लोकतान्त्रिक फोरमबाट भौतिक पूर्वाधार तथा यातायात राज्यमन्त्री थिए ।

लोकतान्त्रिक पार्टीका अध्यक्ष विजय कुमार गच्छदार मन्त्री थिए ।ललिता निवास जग्गा प्रकरणमा भ्रष्टाचार मुद्दामा परेका गच्छदारसँगै प्रहरीले दायर गरेको मुद्दामा साहको नामपनि समावेश गरिएको छ ।