जनकपुरः मोटरसाईकल तुरुन्तै नदिएपछि दुल्हा विहे गर्न आएनन्

न्यूज ब्यूरो, जनकपुरधाम । प्रदेश नं. २ को धनुषा जिल्लामा एक युवतिको विहे (विवाह) रोकिएको छ ।

गत आईतबार बेलुकी आउनुपर्ने जन्ती दाईजोको सम्झौतामा मोटरसाईकल तत्कालै नदिएपछि विवाह रोकिएको हो । धनुषाको नगरलाइन नगरपालिका वडा नं. २ जटहीका सुकदेव सदाकी छोरी पूजा सदाकी विवाह रोकिएको हो ।

विवाहको लागि दुवै तर्फबाट बेहुला पक्षलाई २ आना सुन र एउटा मोटरसाईकलको सम्झौता भएको थियो । तर, मोटरसाईक विहेको दिननै किन्न नसकेपछि वेहुला पक्षले विवाह गर्न नै नआएपछि गाउँमा खैलाबैला मच्चियो ।

पूजाको विवाहका लागि धनुषाको भुतही पटेर्वा निवासी रोहित सदाका २१ वर्षीय छोरा सुशीलसँग साईत जुडेको थियो । त्यसै अनुसार आर्थिक अवस्था अत्यन्त कमजोर भएपनि पूजाकी आमा बेच्नी सदाले छोरीको विवाहका लागि ३ लाख रुपैयाँ चर्को ब्याजमा लिएर सबै तयारी गरेकी थिइन्।

“म मोटरसाईकल दिने सम्झौता गरेकी थिए । फागुन २५ गते राती जन्ती बाराती आउने थियो । तर तुरुन्तै मोटरसाईकल नदिएपछि बेहुला पक्षले विवाह गर्न नै आएनन् । यस्तो अवस्थामा अब हामी साहूको ऋण कसरी चुकाउने त ?”– पूजाकी आमाले भक्कानो फोडेर रोइन ।

विवाह भाँडिएकी पूजाले अब कुनै पनि हालातमा त्यो घरमा विहे नगर्ने अडानमा छिन् । उनले एउटा जाबो मोटरसाईकलको लागि विहे नगर्ने बेहुलाले उनीसँग विवाह गरेपछि झन दाईजोको लोभमा ज्यान पनि लिन सक्ने बताउँदै त्यो घरमा कदापी विहे नगर्ने प्रतिक्रिया दिएकी हुन् ।

यता, धनुषाका प्रमुख जिल्ला अधिकारी (सिडिओ) प्रदीपराज कनेलले यस्ता उपर कानुनी कारवाही गर्ने प्रतिक्रिया दिनुभएको छ । दाइजोको कारण विवाह रोक्नेलाई कारबाहीको दायरामा ल्याउने बताउनुभएको छ ।

बेहुली पक्षले जिल्ला प्रशासन कार्यालयमा जाहेरी दिए दाईजो कसुरको मुद्दामा कारवाही गरिने उहाँले बताउनुभयो ।

यता, बेहुला शुशिल सदा भने घरबाट फरार रहेका छन् । बेहुली पक्षले शुशिलको परिवार उपर कानुनी कारवाहीको प्रक्रियामा गएको बताइएको छ ।