जनकपुरः आज होली खेलिदै, मन्त्री भट्टराई हेलिकप्टरबाट फूलवर्षा गर्ने

न्यूज ब्यूरो, जनकपुरधाम । मधेशको महाकुम्भ १५ दिने माध्यमिकी परिक्रमाका धार्मिक यात्रीहरुले आज होली खेल्ने भएको छ ।

१५ दिने परिक्रमाको नेपालको महोत्तरी जिल्लाको अन्तिम पडावको रुपमा मानिएको कञ्चनवनमा धार्मिक यात्रीहरुले आज होली खेल्ने भएको छ । शनिवार ध्रुवकुण्डमा विश्राम गरेको किशोरीजीको डोला तथा मिथिला विहारीको डोला आज कञ्चनवन पुगी होली खेल्ने परम्परा रहेको छ ।

यस वर्ष कञ्चनवनको होली अझ भव्य बनाउन संघिय सरकारका संस्कृति पर्यटन तथा नागरिक उड्डयन मन्त्री योगेश भट्टराईको प्रमुख आतिथ्यमा विभिन्न सांस्कृतिक कार्यक्रम गरी होली खेलिने वृहत्तर क्षेत्र विकाश परिषद जनकपुरले जनाएको छ ।

उक्त कार्यक्रममा हेलिकप्टर बाट पुष्पवृष्टि अर्थात फूलबर्षा गर्ने कार्यक्रम रहेको जनाइएको छ । परिक्रमाको प्रारम्भमा नेकपाका अध्यक्ष एवम् पूर्व प्रधानमन्त्री पुष्पकमला दाहाल प्रचण्डले पुष्टवृष्टि गर्नुभएको थियो ।

आईतबार दिउँसो १ बजे संघिय सरकारका संस्कृति पर्यटन तथा नागरिक उड्डयन मन्त्री योगेश भट्टराई, प्रदेश २ का आन्तरिक मामिला तथा कानून मन्त्री ज्ञानेन्द्र यादव तथा उद्योग, पर्यटन, वन तथा वातावरण मन्त्री रामनरेश राय लगायत भंगहा नगरपालिकाका मेयर संजीव साहको उपस्थितमा सो कार्यक्रम हुने जनाइएको छ ।

परिक्रमाको धार्मिक लस्कर भोली (सोमबार) धनुषाको पर्वता आउने भएको छ । त्यसपछि धनुषाधाम (कमला स्नान) पछि सतोषर र औहरी हुँदै पुनः भारत प्रस्थान गरी जनकपुर आउने गरिन्छ ।