संघीयता स्थापित गर्न मधेश सरकार र मधेशी जुनसुकै मूल्य चुकाउन तयार छः  मुख्यमन्त्री राउत

न्यूज ब्यूरो, जनकपुरधाम । मुख्यमन्त्री लालबाबु राउतले नीतिमा संघीयता रहेपनि कार्यान्वयन गर्ने संघीय सरकार र उच्च कर्मचारी तन्त्रका नियत केन्द्रियता नै रहेकोले समस्या जन्माएको बताउनु भएको छ ।

नेपाल नगरपालिका संघले आज जनकपुरमा आयोजना गरेको संविधान प्रदत संघ प्रदेश र स्थानीय तहको एकल तथा साझा अधिकार अन्तर्गत प्रयोगमा आएका नीति गत समस्या र चुनौती बारे अन्तर सरकार सम्बाद कार्यक्रममा मुख्यमन्त्री राउतले सो कुरा बताउनु भएको हो ।

उहाँले संविधानमा सुनिश्चित गरि सकेको प्रदेश र स्थानीय तहको अधिकारलाई समेत संघीय सरकारले संविधान विपरितका ऐनहरु निर्माण गरेर संविधान प्रदत अधिकारलाई कुण्ठित गर्दै संघीयतालाई मास्ने षडयन्त्र गरेको आरोप लगाउनु भयो ।

संघीयता समाप्त हुने र फेरी आफुहरुको रजाई हुने मानसिक्ता बोकेका उच्च कर्मचारीहरुले संविधान कार्यान्वयमा विभिन्न बखेडा झिकिरहेको उल्लेख गर्नु हुँदै उहाँले भन्नु भयो ,‘ संघीयता समाप्त हुन्छ भन्ने दिवा स्वप्न नदेखे हुन्छ । संघीयता ल्याउने मधेशी जनता र प्रदेश २ को सरकार संघीयतालाई स्थापित गर्न जुन सुकै मुल्य चुकाउन तयार छ ।'

मुख्यमन्त्री राउतले बजेटको असमान बाँड फाँडले संघीयता कार्यान्वयनमै समस्या उत्पन्न गरेका ले अव स्थानीय तहलाई ३० प्रतिशत , प्रदेशलाई ३० प्रतिशत र संघ लाई ४० प्रतिशत बजेटको बाँडफाँड गराउन प्रदेश र स्थानीय तहलाई एक जुट भई अवाज उठाउनु पर्दछ ।

नगरपालिका संघ प्रदेश २का अध्यक्ष शेख वकिलको अध्यक्षतामा भएको उक्त कार्यक्रममा नगरपालिका संघका केन्द्रिय अध्यक्ष अशोक बेञ्जो, प्रदेश सभा सदस्य राम अशिष यादव, परमेश्वर साह, अनिता यादव , जनकपुर उपमहानगरका प्रमुख लालकिशोर साह सहितका वक्ताहरुले सम्बोधन गर्नु भएको थियो ।