प्रदेश नं. २ को सरकार परिवर्तन हुन्छ : प्रचण्ड

न्यूज ब्यूरो, जनकपुरधाम । पूर्व प्रधानमन्त्री एवम् नेकपामा अध्यक्ष पुष्प कमल दाहाल प्रचण्डले प्रदेश नं. २ (मधेश) सरकार परिवर्तन हुने संकेत रहेको बताउनुभएको छ ।

आजदेखि सुरु भएको १५ दिने माध्यमिकी परिक्रमामा सलामी दिन धनुषा आउनुभएका प्रचण्डले प्रदेश नं. २ को सरकार परिवर्तनको लागि आन्तरिक गृहकार्य थालिएको बताउनुभएको हो ।

प्रदेश नं. २ मा नेकपाको सरकार बनाउन उपेन्द्र यादव नेतृत्वको संघीय समाजवादी पार्टी नेपाल र राष्ट्रिय जनता पार्टी (राजपा) नेपालसँग आन्तरिक गृहकार्य थालिएको बताउँदै उहाँले शिघ्र नै सरकार परिवर्तन हुने बताउनुभएको छ ।

श्रद्धालुहरुलाई सम्बोधन पश्चात पत्रकार सम्मेलन गर्नुभएको थियो । पत्रकार सम्मेलन सम्पन्न भएपछि सोधिएको एक प्रश्नमा उहाँले प्रदेश सरकार परिवर्तनको लागि गृहाकर्य भईरहेको बताउनुभयो ।

हेलिकप्टरबाट विहान धनुषाको कचुरी ठेरा स्थित रहेको मिथिला विहारीको मन्दिर आईपुग्नुभएको प्रचण्डले हेलिकप्टरबाटै पुष्पवर्षा गर्नुभएको थियो । यता, प्रदेश नं. २ का मुख्यमन्त्री लालबाबू राउतले प्रदेश सरकार परिवर्तनको कुनै तुक नरहेको तथा अफवाह मात्र रहेको बताउँदै आउनुभएको छ ।