मधेशकै प्रसिद्ध मकर मेलामा १२ करोड बढीको व्यापार

न्यूज ब्यूरो, जनकपुरधाम । प्रदेश नं. २ को सबभन्दा ठुलो मेला मानिएको मकर मेलामा यसपाली १२ करोड बढीको व्यापार भएको बताइएको छ ।

प्रत्येक वर्ष माघ मसान्तभरि लाग्ने सबभन्दा ठुलो आयूको मेला मकर मेलामा १२ करोड बढीको व्यापार भएको स्थानीय व्यापारी शिव साहले बताएका छन् । प्रत्येक वर्ष एक महिनाभरि नै लाग्ने मकर मेलाको क्रममा सबभन्दा बढी व्यापार तेजपात (पतरक) को हुँदै आएको छ ।

अन्य वर्षको तुलनामा यसवर्ष धनुषाधाम मकर मेलामा १२ करोड बढीको व्यापार हुनुमा स्थानीय सरकारको समेत भूमिका रहेको धनुषाधाम नगरपालिकाका मेयर बालेश्वर मण्डलले बताउनुभयो । उहाँले मकर मेलाको लागि विभिन्न सँचारमाध्यमहरुबाट गएको प्रचारात्मक समाचार, सूचनाको माध्यमले विभन्न ठाउँबाट लाखौंको सँख्यामा सर्वसाधारणहरु आएपछि व्यापार बढेको बताउनुभयो ।

माघ १ देखि सुरु हुने मकर मेला माघ महिनाभरि नै जारी हुन्छ , तर प्रत्येक आईतबार भने भव्य रुपमा मेला लाग्ने गरिन्छ । तरकारीमा स्वाद र मिठो बास्नाको लागि प्रयोग गरिने तेजपातको विक्री वितरण मेलाको मुख्य आकर्षणको रुपमा हुन्छ । मेला भर्न आउने प्रायः सबै सर्वसाधारण तेजपात किनेर मात्र घर फर्कन्छन् ।

यस्तै, व्यापारिक दृष्टिकोणले पनि विभिन्न ठाउँबाट आएका व्यावसायीहरुले सवारी रिजर्भ गरी हजारौंको तेजपात एक्लै लाने गरेको देखिएको थियो । अन्य समयमा बेच्नको लागि व्यापारिक दृष्टिकोणले सालभरिको लागि एकैपटक तेजपात स्टोर गर्ने गरिन्छ ।

यसका साथै, मकर मेला प्रत्येक आईतबार लागेपनि तेजपातको विक्री वितरण भने महिनाभरि नै प्रत्येक दिन हुने गरिन्छ । आईतबारको दिन औसत एक जनाले कम्तीमा पनि ३ किलो तेजपात खरीद गर्ने गरेको धनुषाधाम नगरपालिका वडा नं. ३ का वडाध्यक्ष राजकुमार साहले बताउनुभयो । एक किलोको ६० रुपैयाँ देखि १०० वा १२० सम्म पनि बेच्ने गरेको उहाँले बताउनुभयो ।

मेला भर्न आएका सर्वसाधारणको चाप अनुसार तेजपातको मूल्यमा वृद्धि गरी विक्री वितरण गरिएको कारण यसपाली १२ करोड बढीको व्यापार भएको अनुमान गरिएको हो । मेलाको ठेक्का प्रत्येक वर्ष लाग्ने गरेको छ । आगामी वर्ष देखिधनुषाधाम नगरपालिकाले मकर मेलालाई महोत्सवको रुपमा लैजाने तयारी गरेको नगर प्रमुख मण्डलले बताउनुभयो ।

मकर मेलामा तेजपात बाहेक घरेलु हातहतियार जस्तै कुल्हारी, बन्चरो, कोदाली, हँसिया सहित पंक्षीमा सुगा तथा खाद्यान्न तर्फ दालमोठको व्यवसाय पनि फस्टाएको थियो । मेलामा दोस्रो बढी व्यापार भनेको भाँटाको हो । मन्दिरमा भाकलको रुपमा चढाउने भनेको भाँटा नै हो । दुईटा भाँटाको २० रुपैयाँ देखि ५० रुपैयाँसम्म विक्री वितरण गरिदै आएको थियो ।

मुसो रोग निको हुने जनविश्वास सहित भाकल गरेका श्रद्धालुहरु भाँटा भार चढाउने गरिन्छ ।