धनुषाका सामुदायिक विद्यालयहरुमा शिक्षक पूर्ति चाँडै

न्यूज ब्यूरो, जनकपुरधाम । धनुषाका सामुदायिक विद्यालयहरुमा चाँडै शिक्षक पूर्ति गरिने भएको छ ।

शिक्षा विकास तथा समन्वय इकाई समिति धनुषामा भएको सहजीकरण कार्यक्रमबाट नेपाल सरकारबाट तोकिएको समयमै दरवन्दी मिलान तथा शिक्षक व्यवस्थापन गर्ने निर्णय गरेको हो । बैठकले जिल्लाका सबै स्थानीय तहले आगामी फागुन २२ गतेभित्र विवरण उपलब्ध गराउनुपर्ने निर्णय गरेको छ ।

केन्द्रबाट शिक्षक दरवन्दी (मिलान तथा पदस्थापना) कार्यविधि २०७६ मा तोकिएको आधारहरुबाट व्यापक छलफल भएको तथा दरवन्दी मिलान र शिक्षक व्यवस्थापन तोकिएको समयावधिमा सम्पन्न गरी शिक्षा विकास तथा समन्वय इकाई समितिमा स्थानीय तहले विवरण बुझाउनुपर्ने निर्णय भएको शिक्षा विकास तथा समन्वय इकाई समिति धनुषाका अध्यक्ष बरखुप्रसाद रजकले जानकारी दिए ।

उनले जिल्लाका सामुदायिक विद्यालयहरुमा शिक्षक पूर्तिको लागि प्राथमिकता साथ काम गरिरहेको जनाए ।