जनकपुरः गर्भपतन गराएकी महिलाको पेटमै बच्चाको अवशेष

न्यूज ब्यूरो, जनकपुरधाम । जनकपुरमा गर्भपतन गरीएको महिलाको पेटमा बच्चाको शरिरको अवशेष भेटिए पछि विवाद चर्केको छ ।

जनकपुरका चर्चित स्त्री तथा प्रसुति रोग विशेषज्ञ डा. रामनरेश पण्डितले ७ महिना पहिले गरेको गर्भपतनमा महिलाको पेटमै बच्चाको शरिरको अवशेष भेटिएपछि विवाद चर्केको हो ।

महोत्तरीको लोहारपट्टी नगरपालिका–७ भ्रमरपुराकी २५ वर्षीय महिलाको ७ महिना पहिले गर्भमै बच्चाको मृत्यु भएपछि गर्भपत गरिएको थियो ।

तर, गर्भपनको क्रममा महिलाको पेटमा बच्चाको शरिरको अवशेष छुटेको थियो । गत असार १० गत्ते ६ महिनाको बच्चा गर्भमै मरेको थाहा पाएपछि पिडित महिला डा पंडितको निजि क्लिनिकमा गर्भपतन गराएका थिए । गर्भमै मरेको बच्चालाई बाहिर निकाले पनि चन्दा पटक पटक विरामी हुँदै आएको उनका पति राजेश पाण्डेले जनाएका छन् ।

गर्भपतन पछि लामो समय सम्म समस्या भएपछि पुन अप्रेशन गर्दा महिलाको पेटबाट वच्चाको शरिरको अवशेष फेला परेको पिडित परिवारले जनाएको छ । गर्भपतन भएको ७ महिना पछि काठमाडौंमा जाँच गराएर अप्रेशन गरि महिलाको पेटबाट बच्चाको अवशेष निकालिएको हो ।

गर्भपतन देखि नै स्वास्थ्यमा समस्या आएपछि डा पण्डितकै सलहमा महिला निरन्तर औषधी सेवन गरेका थिए । तर, सुधार नभएपछि जनकपुरकै डाक्टर आर एन झा सँग चेकजाँच गराउदा पेटमा बच्चाको अवशेष रहेको पुष्टि भएको थियो ।

डा झाको रिपोर्ट गलत रहेको डा पण्डितले दावी गरेपछि पिडित महिला उपचारका लागि काठमाडौ पुगेका थिए ।यता गर्भपतन गरिएको महिलाको पेटमा बच्चाको अवशेष छुटेको विषयमा प्रतिक्रिया लिन खोज्दा डा.रामनरेश पण्डित सम्पर्कमा आउन नचाहेको मिथिलाञ्चल एफएमको समाचारमा भनिएको छ ।