चलाउन नजानेपनि मधेशका सबै साँसदले महँगो ल्यापटप पाउने

न्यूज ब्यूरो, जनकपुरधाम । प्रदेश नं. २ का सबै साँसदहरुले अब ल्यापटप पाउने भएका छन् । प्रदेश नं. २ का प्रदेश सभालाई कागजविहिन “पेपरलेस” बनाउनको लागि यो योजना लागू गर्ने भएको छ ।

त्यसको लागि सबै साँसदहरुको ल्यापटप आइसकेको जनाइएको छ । प्रदेश सभाको वार्षिकोत्सवको अवरमा साँसदहरुलाई मधेश सरकारले ल्यापटप दिने भएको छ । यसअघि केन्द्रीय सरकारले समेत सँघीय साँसदहरुलाई ल्यापटप वितरण गरिसकेको छ । प्रदेश नं. २ मा पनि केही दिनभित्रै सबैलाई वितरण गरिने सभामुख सरोजकुमार यादवले बताउनुभयो ।

प्रदेशसभालाई ‘पेपरलेस’ बनाउन र सरकारको खर्च जोगाउन सबै सांसदलाई ल्यापटप दिन लागिएको बताउँदै उहाँले कागज, मसी र प्रिन्टर गरी वर्षको ५ करोड त्यसमै खर्च भइरहेकोले त्यसलाई बन्द गर्न र न्यून गर्नको लागि पनि ल्यापटप दिन लागेको बताइएको छ ।

साँसदहरुले ल्यापटप पाएपछि सरकारको खर्चको बचत हुने र सबै सांसदले विधेयकमाथि लागेको कुरादेखि संशोधनसम्म ल्यापटपमै लेखेर सिधै इमेल गर्न सक्ने व्यवस्था विस्तार गरिने जनाइएको छ । यसअघि कागजमा गर्दै आएको सबै खेस्रा, डकुमेन्टेशनहरु अब ल्यापटपमै गर्नुपर्ने र त्यसले कार्य सरलता पनि हुने बताईएको छ ।

यद्यपी प्रदेश नं. २ अधिकांश साँसदहरुले ल्यापटप भने चलाउन जानेका छैनन् । साँसदहरुलाई उनको स्वकीय सचिवले सिकाउने प्रबन्ध पनि मिलाउन लागिएको जनाईएको छ । प्रदेश नं. २ मा जम्मा १ सय ७ जना साँसदहरु रहेका छन् ।