मेयर र पत्रकारबीचको गुत्थी नसुल्झिए क्षतिको चेतावनी

न्यूज ब्यूरो, जनकपुरधाम । गत पुस २२ गते भएको जनकपुरका मेयर र पत्रकारहरुबीचको घटनालाई नमिलाए सँचार क्षेत्रलाई नै क्षति हुने चेतावनी दिइएको छ ।

स्वतन्त्र पत्रकार नामक सँगठनले जनकपुरका मेयर लालकिशोर साह र नेपाल पत्रकार महासंघ धनुषा शाखाका पदाधिकारीहरुबीच भएको घटनालाई सहमतिको माध्यमबाटै सुल्झाए उचीत हने भन्दै यस्तो नभएको खण्डमा जनकपुरवासी सहित कालान्तरमा सँचार क्षेत्रलाई नै क्षति हुने चेतावनी समेत दिइएको छ ।

मँगलबार जारी गरिएको प्रेस विज्ञप्तिमा –“पछिल्लो समय यस घटनामा सञ्चार क्षेत्रका साथीहरुको जुन किसिमको भूमिका देखिएको छ, त्यो आफैँमा शंकास्पद देखिन्छ । यस घटनामा सञ्चारकर्मीहरुले दोहोरी नीति अपनाएको देखिन्छ । त्यस्ता दोहोरो नीति तथा द्वैध चरित्रले समस्या समाधान भन्दा बढी समस्यालाई झन् बल्झाईरहेको अवस्थातर्फ अग्रसर भईरहेको देखिन्छ । तसर्थ समस्यालाई बल्झाउनु भन्दा समाधान तर्फ ध्यान दिनुपर्ने आवश्यकता बढी देखिएको छ । समस्या बल्झाएर पक्कै पनि न त जनकपुरका नगरवासीलाई फाईदा हुनेछ भने कालान्तरमा सञ्चार क्षेत्रलाई समेत ठुलै क्षति व्यहोर्नु पर्ने देखिईरहेको छ ।यस घटनामा खास गरि नेपाल पत्रकार महासंघकै जिम्मेवार पदाधिकारीहरुको भूमिका शंकास्पद देखिन्छ । उहाँहरुको दोहोरो नीतिका कारण सञ्चार क्षेत्र समेत दुई खेमामा बाँडिन पुगेका हुन् । नेपाल पत्रकार महासंघको नेतृत्वले समस्या समाधान गर्नका लागि पहल गर्नुभन्दा पनि समस्या बल्झाउन खोजिरहेको कुरा उहाँहरुको पछिल्लो भूमिकाले स्पष्ट पारेको छ ।”– भनेर उल्लेख गरिएको छ ।

सञ्चारकर्मी समाजको ऐना तथा गहनाको रुपमा स्थापित भएको भन्दै जनताको लागि केवल वकालत गर्नुपर्नेमा पछिल्लो समय जनकपुरको केही सञ्चारकर्मीहरुले आफुलाई न्याय दिने अदालतका न्यायधिश भन्दा पनि अगाडि ठानिरहेको आरोप लगाइएको छ । सोही अहमताका कारण यस्तो अप्रिय तथा अकल्पनीय घटना हुन गएको ठहर गरेको हो ।

पछिल्लो समय पत्रकार महासंघ धनुषाका दोहोरी नीति तथा द्वेध चरित्रका कारण सिंगो सञ्चार क्षेत्र बदनाम हुन पुगेको उल्लेख गर्दै जनकपुर क्षेत्रका सञ्चारकर्मीहरुको शीर निहु¥याएको बताइएको छ ।

“यस घटनाको समस्या समाधानका लागि सञ्चार क्षेत्रका सबै अग्रज तथा युवापुस्ता समेतका सबैजनालाई समेटी वृहत छलफल गरी यस घटनामा कसको कमीकमजोरी र गल्ती रहेको छ उक्त विषय केलाउदै अब के गर्ने भन्ने निर्णय गनुपर्ने थियो । तर त्यसो गरेको देखिएन । आफ्ना नजिकका केही व्यक्तिहरुबाट निर्णय गराई अगाडि बढेको देखिन्छ । जुन निर्णयमा सबै सञ्चारकर्मीको सहभागिता देखिदैन भने उक्त निर्णय कार्यान्वयनमा समेत सबै सञ्चारकर्मी भित्री मनबाट लागेको देखिदैन । जसको एउटै कारण छ, एकल नेतृत्व तथा निर्णय प्रक्रियमा तानाशाही प्रवृति ।”– प्रेस विज्ञप्तिमा उल्लेख छ ।

पत्रकार महासंघ यति ठुलो आन्दोलनको घोषणा गर्दा समेत अग्रज सञ्चारकर्मीहरुलाई सहभागि नगराएको भन्दै जनकपुर क्षेत्रका अग्रज सञ्चारकर्मीहरुको समेत अपमान भएको भनिएको छ । यसका साथै, पत्रकार महासंघ कसैको ईसारामा चलिरहेको पनि आरोप लगाइएको छ ।

घटनालाई शान्तिपूर्ण तरिकाले समाधान गर्नुको कुनै विकल्प नरहेको भन्दै वार्ताको माध्यमबाट समाधान गर्नुपर्ने आवश्कता औल्याएको छ ।