श्रीमतिलाई भेटेर मात्र आमाबुवालाई भेटने 'उमेश'

न्यूज ब्यूरो, जनकपुरधाम । साउदी अरेबियामा फाँसीको सजायबाट मुक्त भएर झण्डै १४ वर्षपछि नेपाल फर्केका धनुषाको उमेश यादव आज आफ्नी श्रीमति र दुई छोरालाई भेटेपछि मात्र आमाबुवालाई भेटने भएको छ ।

कमला नगरपालिका वडा नं. ३ पर्सा बस्ने उमेशलाई हेर्नको लागि ब्याकुल भएकी उनकी आमा र उनका बुवा उमेशको प्रतीक्षामा बाटो कुरेर बसेका छन् । नेपाल फर्केको एक साता भईसकेपछि अझै गाउँ नआएका उमेशलाई हेर्नको लागि गाउँलेहरु समेत प्रतीक्षामा छन् ।

नेपाल आएको एक सातामा उमेश आफ्नी श्रीमति, छोरा र आमावुवा भेटनुभन्दा पनि विभिन्न मिडियामा पुगेर जेली जीवनको बारेमा बयान गरेका हुन् । आज काठमान्डौंबाट फर्कने लगत्तै आफ्नी श्रीमति र दुई छोरालाई भेटने कार्यक्रम रहेको उमेशका भतिज रामबाबु यादवले बताए ।

श्रीमति र छोरा भेटेपछि मात्र आफ्नो गाउँ गएर आमाबुवालाई भेटने बताइएको छ । त्यसको लागि एनजिओकर्मी सरोज रायले उमेशलाई स्वागत गर्नको लागि उनका आमाबुवालाई फूलमाला, मँच, लाउडस्पीकर तयार गरेर राख्न भनिएको बताइएको छ ।

उमेशलाई ३० लाख रुपैयाँको ब्लडमनी माग, परिवारले गरे सहयोगको अपिल !

उमेश हत्या अभियोगमा साउदीमा जेल परेपछि अब कहिले नआउने भन्दै उनकी श्रीमति उनको आमावुवालाई छाडेर गएकी थिईन् । उमेशको समाचार र बचाउने अभियान थालेपछि मात्र उनकी श्रीमतिले उमेशको आमालाई भेटन आएकी थिइन् ।

उमेश बचाउ अभियानको क्रममा उठेको रकम मध्ये उनकी श्रीमतिलाई समेत विभिन्न संघ सँस्था तथा विदेश बस्ने नेपाली युवकहरु लाखौ रुपैयाँ सहयोग गरेको हो । उमेशको आमावुवालाई समेत युवाहरुले सहयोग गरेको हो ।

गत १४ वर्षदेखि उमेश एक पाकिस्तानी नागरिकको हत्या अभियोगमा साउदीको जुबेल जेलमा कैदी जीवन विताउँदै आएका थिए । २ वर्षअघि न्यूज ब्यूरोमा उमेशको समाचार प्रकाशित भएपछि उनको बचाउको लागि अभियान थालिएको थियो ।