प्रदेश २ को राजधानी जनकपुरधाम सर्वसम्मत पारित

न्यूज ब्यूरो, जनकपुरधाम । प्रदेश २ को स्थायी राजधानी जनकपुरधाम नै कायम हुने लगभग निश्चित भएको छ ।

प्रदेशको नामाकरण र राजधानी टुंगो लगाउने सन्दर्भमा सभामुख सरोजकुमार यादवको संयोजकत्वमा गठित संसदीय विशेष समितिमा प्रदेशको राजधानी जनकपुर तोक्ने सहमति जुटेको हो । राजधानी जनकपुर नै कायम गर्ने निर्णय समितिमा सर्वसम्मतिले पारित भएको समिति संयोजक समेत रहेका सभामुख सरोजकुमार यादवले जानकारी दिए ।

समितिले प्रदेश राजधानीको सीमा पनि टुंगो लगाएको छ । यो प्रस्ताव प्रदेशसभाको दुईतिहाइ बहुमतले पारित गरेपछि राजधानीको अन्तिम टुंगो लाग्नेछ ।

प्रदेशको राजाधानी र नाम सम्बन्धमा विभिन्न दलका सांसदहरूले प्रदेश सभामा भदौ ५ गते प्रस्ताव दर्ता गरेका थिए । प्रस्ताव दर्ता भएपछि प्रदेश सभाको बैठकबाट नै सभामुख यादवको संयोजकत्वमा ११ सदस्यीय विशेष समिति गठन गरिएको थियो ।

गत पुस ११ गतेदेखि काम थालेकोमा यही माघ ११ गते (शनिवार) एक महिना पूरा भएको छ । समिति प्रदेशको नामका सम्बन्धमा भने टुंगोमा पुग्न सकेको छैन । नामका लागि पनि माघ १३ गते सोमबार बैठक बोलाइएको छ ।