ठाढी झिझामा सडक र नाला निर्माण सुरु

न्यूज ब्यूरो, जनकपुरधाम । धनुषाको विदेह नगरपालिकामा विकास निर्माणका कार्यहरुले तीव्रता पाएको छ ।

यसैबीच, विदेह नगरपालिका वडा नं. ४ ठाढी झिझामा विकास निर्माणका योजनाहरु मध्ये सडक तथा नाला निर्माण कार्य सुरु भएको छ । वडा नं. ४ बस्ने काशिनाथ मिश्राको घर देखि नहरसम्म सडक निर्माण तथा नाला निर्माणको कार्य सुरु भएको वडा नं. ४ का वडाध्यक्ष विनोद गोहितमानले जानकारी दिनुभयो ।

गोहितमानका अनुसार सडक निर्माण र नाला निर्माण नहुँदा स्थानीय जनताले वर्षायाममा सास्ती भोग्नुका साथै नालाको अभावका कारण घरमा समेत पानी पस्ने समस्यालाई मध्यनजर गर्दै योजनालाई कार्यन्वयन गर्न लागिएको हो । उक्त योजनाको लागि ३० लाख रुपैयाँ बजेट विनियोजन गरिएको जनाइएको छ ।

सो क्रममा मिश्राको घर देखि नहरसम्म २ सय मिटरको सडक तथा दुवै तर्फबाट नाला निर्माण कार्य थालिएको हो । सडक निर्माणका साथै त्यसमा पिसीसी ढलान कार्य समेत सुरु गरिएको जनाइएको छ । साथै सोही वडामा ३ ठाउँमा कलभर्ट निर्माण समेत गरिने जनाइएको छ ।