मन्दिर बनाउन जति खर्च लाग्छ हामी विनियोजन गर्छौ : मेयर दास

न्यूज ब्यूरो, जनकपुरधाम । धनुषाको विदेह नगरपालिकाका मेयर बेचन दासले मन्दिर बनाउन जति खर्च लागेपनि नगरपालिकाले विनियोजन गर्ने प्रतिवद्धता जनाउनुभएको छ ।

आज (शनिबार) दिउँसो विदेह नगरपालिका वडा नं. ५ इकराही जामुन चोकमा आयोजना गरिएको एक कार्यक्रममा मेयर दासले मन्दिर जिर्णोद्धारको लागि चाहिने रकम र बजेट नगरपालिकाले विनियोजन गर्ने जनाउँदै मन्दिर निर्माणलाई पूर्णता दिन निर्देशन दिनुभयो ।

नेपाल कम्यूनिष्ट पार्टी (नेकपा) को भातृ संगठन दलित मुक्ति मोर्चाले आयोजना गरेको एक कार्यक्रममा प्रमुख अतिथिको आसनबाट बोल्दै मेयर दासले मन्दिर जस्ता धार्मिक स्थलहरुलाई जिर्णोद्धारको लागि, निर्माणको लागि आफू सदैव तत्पर रहेको बताउनुभयो । उहाँले जामुनचोकमै निर्माणधिन रहेको हनुमानजीको मन्दिरलाई शिघ्र पूर्णता दिन आग्रह गर्नुभयो ।

सोही क्रममा मेयर दासले एक साताभित्रै त्यहाँ यथाशिघ्र सोलार लाइट जडानको लागि निर्देशन दिनुभएको हो । मन्दिरमा विजुलीको सुविधा समेत नभएको भन्दै उहाँले तत्कालै सोलार लाईट जडानको लागि निर्देशन दिनुभएको हो । कैयौं वर्षदेखि निर्माणधिनै अवस्थामा रहेको हनुमान जीको मन्दिर निर्माणलाई पूर्णता दिनको लागि चाहिने आवश्यक रकम अपुग भएपछि निर्माण कार्य चन्दा उठाएर भएपनि कछुवा गतिमा हुँदै आएको थियो ।

मेयर दासले जति रकम लागेपनि शिघ्र रुपमा मन्दिरलाई पूर्णता दिन भनेपछि स्थानीयहरु हर्षित भएका छन् । कैयौं वर्षदेखि पूर्णता पाउन नसकेको हनुमानजीको मन्दिरको लागि मेयर दासले देखाएको भावनाप्रति उपस्थित स्थानीयहरुले प्रशँसा जनाए । मन्दिरको रँगरोगन सहित सौन्दर्यीकरण समेत गरिने जनाइएको छ ।

सो कार्यक्रममा दलित, अल्पसँख्यकहरुको दैनिकी र उनीहरुको समृद्धि तथा विकासको लागि विभिन्न योजनाहरु उपर छलफल गरिएको थियो । सो कार्यक्रममा पूर्व साँसद राम अवतार पासवान, दलित मुक्ति मोर्चाका केन्द्रीय सदस्य रामलोचन पासवान, पार्टी सँयोजक दुःखी मण्डल लगायतका पदाधिकारीहरुको सहभागीता रहेको थियो ।