बुद्ध एयरको जनकपुरबाट रात्रिकालिन उडान भर्ने तयारी पूरा

न्यूज ब्यूरो, जनकपुरधाम । नेपाल सरकारको अभियान पर्यटन वर्ष २०२० सफल बनाउने उदेश्य भन्दै बुद्ध एयरले भाडा घटाउँदै जनकपुरबाट रात्रीकालिन उडान समेत भर्ने तयारी पूरा गरेको छ ।

बुद्ध एयरले जनकपुरबाट काठमाण्डौंका लागि प्रति यात्रु १८ सय रुपैयाँ भाडा निर्धारण गरेको हो। भाडा घटाउनुको साथै जनकपुर विमानस्थलबाट यही माघ ६ गतेदेखि रात्रीकालीन विमान चलाइने तयारी लगभग पूरा भएको जनाइएको छ । आवश्यक सम्पूर्ण तयारी पुराभएपछि पहिलो र दोस्रो चरणको टेस्ट सम्पन्न भएकाले माघ ६ गतेदेखि प्रत्येक राती बुद्ध एयर जनकपुरधाम आउने बुद्ध एयर जनकपुरधामका प्रमुख विजय सिंहले जानकारी दिनुभयो।

सिंहका अनुसार रात्रिकालीन उड़ानको लागि बिभिन्न चरणमा टेस्ट हुने गर्छ त्यसको प्रक्रिया सम्पन्न भइसकेको छ । जनकपुरधाम विमानस्थलमा बुद्ध एयरको विमान जेठ महिनामा पहिलो टेष्टीगंको रुपमा अवतरण गरेको थियो भने दोस्रो टेष्ट यसै साता गरिएको छ । यस अघि नै रात्रीकालीन सेवा सुरु गर्न आवश्यक रहेको ‘रनवे लाइट’ र ‘आइएफआर’ जडान भएर जाँचसमेत भइसेको छ ।

रात्रिकालिन उडान सुरु भएपछिको उडान तालिका

---

जनकपुर - काठमान्डौं	काठमान्डौ-जनकपुर
विहानः 09:20 बजे	विहानः 08:50 बजे
दिउँसो :14:05 बजे	दिउँसो :13:30 बजे
अपरान्ह: 18:00 बजे	अपरान्ह: 17:20 बजे
भाडा दर मात्र १,८०० रुपैयाँ नेपाली

रात्रीकालीन सेवाका लागि अन्य प्राविधिक कार्यहरु यसअघि नै पुरा भइसकेपनि वरिपरि रहेका रुखहरु समस्याको रुपमा देखिएको थियो । बाधक बनेको रुखहरु पनि काटेर हटाइएको जनाइएको छ । विमानस्थल वरिपरि अग्ला देखिने प्रजातीका झण्डै चार सय रुख काटिएको छ । रात्रीकालीन सेवा सुरु हुँदा सानोतिनो काम भएकाहरु सोहिदिन काम गरेर फर्कन सक्ने जनकपुरधामका व्यवसायीहरु बताउँछन् ।

यता, श्री एयरलाईन्सले समेत जनकपुरसम्मको डोमेस्टिक उडान सुरु गरेको छ । यसअघि जनकपुरसम्म मात्र बुद्ध एयर र यति एयरलाईन्स उडान भर्दै आएकोमा श्री एयरलाईन्सले समेत उडान सुरु गरेपछि यात्रुहरुलाई धेरै कुर्नुपर्ने तथा चर्को भाडाबाट राहत महसुस भएको छ । श्री एयरलाईन्सले १७ सय रुपैयाँमा तत्कालै उडान भरेको छ भने सुविधायुक्त मानिएको बुद्ध एयरले पनि मात्र १८ सय भाडा दर तोकेर यात्रु तान्न सफल भएको छ ।