आज राष्ट्रिय योग दिवस : मिर्चैयामा र्याली प्रदर्शन गरी मनाइयो

न्यूज ब्यूरो, सिरहा । मानव जीवनलाई स्वस्थ्य र स्फूर्त रहन तथा रोगबाट मुक्ति पाउने साधनाको रुपमा विश्वविख्यात योग दिवस आज मुलुकभर विभिन्न कार्यक्रम गरी मनाइएको छ ।

नेपालको विभिन्न ठाउँहरुमा आज राष्ट्रिय योग दिवस मनाइरहँदा मिर्चैयामा पनि विविध कार्यक्रम गरी दिवस मनाइएको छ । पाचौं योग दिवसको अवसरमा मिर्चैयामा योगसहित बृहत र्याली प्रदर्शन गरिएको हो ।

पतञ्जली योग समिति मिर्चैयाको आयोजनामा भएको योग दिवस विशेष कार्यक्रममा योग गरौं निरोग रहौं कपालभाती जीवनसाथी र राष्ट्रिय योग दिवस सफल पारौं नाराका साथ मिर्चैयाको विभिन्न भागको परिक्रमा गरिएको छ । जनता प्रावि मटियर्बाबाट निस्केको र्याली मिर्चैयामै रहेको योग भवनमा कोणसभा गरि सम्पन्न गरिएको थियो ।

पतञ्जली योग समिति मिर्चैयाका अध्यक्ष अकलदेव सिंहको अध्यक्षतामा भएको कार्यक्रममा प्रमुख अतिथिका रुपमा राप्रपा नेता तथा समाजसेवी रामप्रताप साह (भोला), विशिष्ट अतिथिका रुपमा प्रदेश सांसद दिलीप साह, योग समितिका भरत महासेठ, प्रदीप तिवारी, किशोरी साह, रामप्रताप यादवका साथै २ सयबढी सर्वसाधारणको सहभागिता थियो ।

२०७२ श्रावण २८ गतेको मन्त्रिपरिषद्को बैठकले माघ १ गते राष्ट्रिय योग दिवस मनाउने औपचारिक निर्णय गरेपछि त्यसयता नेपालमा प्रत्येक माघ १ लाई राष्ट्रिय योग दिवसका रुपमा मनाउन थालिएको हो ।