कम्युनिष्ट नेताको निरंकुशताले कार्यकर्ता आँसु बगाउँदैछन् : जितेन्द्र देव

न्यूज ब्यूरो, काठमाडौं । राष्ट्रिय सभाका सदस्य तथा कांग्रेस नेता जितेन्द्र देवले प्रतिनिधि सभाको सभामुख चयनमा आएको अड्चनबारेमा प्रश्न उठाएका छन् ।

बिहीबार बसेको राष्ट्रिय सभाको बैठकमा विशेष समय लिएर बोल्दै सदस्य देवले नेपाल कम्युनिष्ट पार्टीका शीर्ष नेताहरु निरंकुश बन्दै गएको आरोप लगाएका छन् । देवले प्रदेशको नाम र राजधानी चयनमा भएको हस्तक्षेपको पनि तीव्र विरोध गरे ।

‘प्रदेशको नामाकरण र राजधानी चयनमा पार्टीका शीर्ष नेताको निरंकुशताको बन्दी हुने यो कस्तो तरिका हो? यसले गम्भीर संवैधानिक प्रश्न तेर्सिएको छ’, उनले भने, ‘सभामुखको चुनावका लागि स्पष्ट संवैधानिक व्यवस्था र प्रतिनिधिसभाको नियमावली छ। यस अनुसार किन निर्णय प्रक्रिया अघि बढाइँदैन।’

नेता देवले नेपाल कम्युनिष्ट पार्टीका शीर्ष नेताको निरंकुशताले कार्यकर्ताहरु आँसु बगाउन बाध्य भएको जिकिर गरे। ‘किम्युनिष्ट पार्टीका नेताको निरंकुशताले कार्यकर्ता आँसु बगाउँदैछन्’, उनले भने, ‘लोकतान्त्रिक प्रक्रियाप्रति आस्था छ भने यो समस्या तत्काल हल गर्नुपर्छ। सभामुखको निर्वाचन प्रक्रिया तत्काल अगाडि बढाउनुपर्छ।’ सांसद देवले प्रदेश ३ लाई त्यहाँको नाम र राजधानी कहाँ राख्ने निर्णय गर्ने अधिकारर दिनुपर्ने जिकिर गरे ।