प्रदेश २ : पाँच वर्षमा प्रतिव्यक्ति आय १ हजार डलर पुर्याइने

न्यूज ब्यूरो, जनकपुरधाम । प्रदेश २ सरकारले पहिलो पञ्चवर्षीय आवधिक योजनाको आधारपत्र २०७६ सार्वजनिक गरेको छ ।

मुख्यमन्त्री लालबाबु राउतले बुधबार पहिलो पञ्चवर्षीय आवधिक योजना सार्वजनिक गरेका हुन् । मुख्यमन्त्री राउतले आवधिक योजनाको आधारपत्रलाई टेकेर योजनाहरु ल्याउने बताएका छन् ।

प्रदेश नीति आयोगका अध्यक्ष समेत रहेका मुख्यमन्त्री राउतले आउँदो आर्थिक वर्षको नीति तथा कार्यक्रममा पनि आवधिक योजनाको आधारपत्रलाई टेकेर योजनाहरु समावेश गर्ने बताए । नीति आयोगका उपाध्यक्ष डा. भोगेन्द्र झाले आउँदो पाँच वर्षपछि प्रादेशिक आर्थिक वृद्धि दर ११ प्रतिशत पुर्याउने लक्ष्य प्रदेश सरकारको रहेको बताए ।

प्रदेश नम्बर २ को आर्थिक वृद्धि दर ६.५३ बाट आउँदो ५ वर्षमा ११ प्रतिशत पुग्ने लक्ष्य हासिल गर्ने उद्देश्य रहेको उनले बताए । प्रदेश सरकारले २७.७ प्रतिशत रहेको गरिबी दर घटाएर २१ प्रतिशतमा झार्ने लक्ष्य लिएको छ ।

प्रदेशको कूल ग्राहस्थ उत्पादन ४ सय ८८ अर्बबाट ६ सय अर्ब पुर्याउने लक्ष्य लिएको उपाध्यक्ष डा. झाले बताए । आगामी ५ वर्षमा प्रदेशको प्रतिव्यक्ति आय १ हजार अमेरिकी डलर पुर्याउने लक्ष्य प्रदेश सरकारको छ ।