उपेन्द्र र चित्रलेखा यादवद्वारा नख्खु खोलाको जग्गा कब्जा समाचार निराधार : समाजवादी

न्यूज ब्यूरो, जनकपुरधाम । समाजवादी पार्टीका राष्ट्रिय अध्यक्ष उपेन्द्र यादवले आफू विरुद्ध लेखिएको समाचार निराधार रहेको स्पष्टोक्ति दिनुभएको छ ।

केही अनलाईन सहित दृष्टि साप्ताहिक पत्रिकामा “उपेन्द्र र चित्रलेखा यादवद्वारा नख्खु खोलाको जग्गा कब्जा” शिर्षक अन्तर्गत समाजवादी पार्टीका अध्यक्ष उपेन्द्र यादव समेत भई नख्खु खोलाको जग्गा कब्जा गरेको भनि समाचारहरु प्रसारण गराइएको प्रति गम्भिर ध्यानाकर्षित गर्दै समाचार निराधार रहेको बताईएको छ ।

पार्टीका अध्यक्ष उपेन्द्र यादवले मँगलबार एक प्रेस विज्ञप्ति जारी गर्दै उक्त जग्गाको मामलामा आफ्नो कुनै संलग्नता वा जानकारी समेत नभको बताउनुभएको छ । उक्त समाचार कसैको राजनीतिक स्वार्थबाट प्रेरित भई बिना प्रमाण र बिना आधार कपोरकल्पित, असत्य र निराधार हुनुका साथै केवल भ्रम फैलाउने र बदनाम गराउने मनसायले मात्र प्रचार प्रसार गराइएको ठहर विज्ञप्तिमा गरिएको छ।

यादवद्धारा हस्ताक्षरित समाजवादी पार्टीको लेटरप्याडमा जारी गरिएको प्रेस विज्ञिप्तमा– “पत्रकारिता जस्तो मर्यादित एवम्‌ गरिमामय जगतलाई नै बदनाम र जनअविस्वास पैदा गर्ने पितपत्रकारिता गर्नु अत्यन्त घिनलाग्दो एवम्‌ दुःखद हो ।” भनेर उल्लेख गरिएको छ ।

उक्त समाचारको सत्यता प्रमाणित गर्न तथ्यगत र सत्य प्रमाण समेत प्रस्तुत गर्न चुनौति दिँदै उहाँले विज्ञप्ति मार्फत नै कुनै सत्यता नै नभएको आधारहीन असत्य र झुठा, कपोकल्पित एवम्‌ भ्रमात्मक तथा पूर्वाग्रही यस्ता समाचारहरु प्रति विश्वास नगर्न र भ्रममा नपर्न सम्पूर्ण जनसमुदायमा अनुरोध समेत गर्नभएको छ ।

यसका साथै असत्य, तथ्यहीन, प्रमाण बिहीन एवम्‌ आधारहीन काल्पनिक समाचारहरु संप्रेषण नगर्न समेत सम्पूर्ण सञ्चार माध्यमरुलाई अनुरोध विज्ञप्तिमा गरिएको छ ।

अनलाईनहरुमा यस्तै निती निर्माण गर्ने तहमा रहेकाहरुले सैबुको नख्खु खोलाको हजार भन्दा बढी रोपनी जग्गा अतिक्रमण गरेको समाचार प्रकाशित गरिएको थियो । नख्खु खोला बग्ने ठाउँ नै अन्यत्र सार्ने निर्णय मन्त्रिपरिषदबाट गरेर हजार रोपनी जग्गा अतिक्रमण गर्नेमा समाजवादीका अध्यक्ष उपेन्द्र यादव, पूर्व शिक्षामन्ती चित्रलेखा यादव, व्यापारी राजेशबाबु श्रेष्ठलगायतका भीभीआइपीहरुको नाम समेत प्रकाशित गरिएपछि त्यसको खण्डन गरिएको हो ।