समाजवादी युवा संघको चेतावनी : “अभिव्यक्ति स्वतन्त्रता खोसे चुप लगाएर बस्दैनौ”

न्यूज ब्यूरो, काठमाण्डौं । समाजवादी पार्टी निकट समाजवादी युवा संघले सरकारले अभिव्यक्ति स्वतन्त्रता खोसे आफूहरु चुप लगाएर नबस्ने चेतावनी दिएका छन् ।

शनिबार समाजवादी यूवा संघ केन्द्रिय समिति काठमाण्डौंको बसेको बैठकबाट वर्तमान सरकारले आम नागरिकको स्वतन्त्रता अभिव्यक्ति खोस्ने प्रयास गरे त्यसको प्रतिकार गर्ने चेतावनी दिएको हो । काठमान्डौंको शान्तिनगरमा बसेको प्रथम केन्द्रिय समिति बैठकबाट अभिव्यक्ति स्वतन्त्रता विरुद्ध सरकारले पास गरेको विद्येयक विरुद्ध आवाज उठाउने निर्णय गरेको हो ।

समाजवादी पार्टीका नेता एवम् प्रदेश नं. २ का भुमि व्यवस्था, कृषि तथा सहकारी राज्यमन्त्री योगेन्द्र राय यादवको अध्यक्षता तथा समाजवादी पार्टीका केन्द्रिय सदस्य तथा यूवा इन्चार्ज देवी सुवेदीको प्रमुख अतिथ्यमा बसेको प्रथम केन्द्रिय समिति बैठकबाट सो निर्णय गरिएको हो ।

१ सय ३३ सदस्य रहेको समाजवादी यूवा संघ केन्द्रिय समितिको बैठकमा बिभिन्न आयोग तथा बिभाग बनाइने निर्णय समेत गरिएको जनाइएको छ । साथै, ४५ सदस्य सहितको राजनितिक सचिवालय समिति गठन गर्ने बारे निर्णय पनि गरिएको जानकारी दिइएको छ ।

यसका साथै, बाँकी रहेको प्रदेशको समायोजन तथा जिल्ला स्तरको समायोजन सम्पन्न गर्न निर्देशन सहित केन्द्रिय यूवा समितिको केन्द्रिय कार्यालय स्थापना गर्न तैयारी समिति बनाई यहि माघ ४ गते समाजवादी पार्टीको केन्द्रिय कार्यालय भवनमा यूवा कार्यालय स्थापना तथा उद्धघाटन गर्ने निर्णय पनि गरिएको हो ।

समाजवादी यूवा संघले देशमा विद्यमान राजनितिक परिस्थिति प्रति आफ्नो चासो राखि त्यस प्रति अहम भुमिका निर्वाह गर्नुको साथै सरकारले उखु किसानहरू संग गरेको सम्झौता सहि तरिकाले पालना नभएको खण्डमा किसानको पक्षमा जोरदार आन्दोलन गर्ने निर्णय समेत गरिएको हो ।

समाजवादी यूवा संघ बैकल्पिक यूवा शक्तिको रूपमा अघि बढेको बताउँदै सबै सदस्यहरुलाई आ–आफ्नो क्षेत्रमा सङ्गठन बलियो बनाउँन र जनता तथा यूवासंग जुड्न र जोड्न ध्यान केन्द्रित गर्न पनि निर्देशन दिइएको हो । समाजवादी पार्टीको सिद्धान्त र बिचारलाई जनता माझ लग्न र जनस्तर सम्म पुगाउने कार्यमा अहम भुमिका निर्वाह गर्न समेत पदाधिकारीहरुलाई निर्देशन दिइएको छ ।

७ वटै प्रदेशको सङ्गठन विस्तार र सङ्गघठित गरि अघि बढ्नु पर्ने सबैको विचारका साथ साथ आयोग र बिभाग कार्यदलले टुङ्गो लगाई अगामि बैठकमा पेस गर्ने निर्णयका साथ बैठक सम्पन्न भएको हो । सो बैठकमा संघका केन्द्रिय सदस्य तथा सह–इन्चार्ज फिरोज मंसुरको बिशिष्ठ अतिथ्य रहेको थियो ।