दुबईमा मधेशीहरुको “मधेशी मिलन”

न्यूज ब्यूरो, दुबई । नेपालीहरुको उल्लासको पर्वको रुपमा मनाइने मकर सँक्रान्तीको अवसरमा विदेशमा रहेका मधेशीहरुले मधेशी मिलन समारोह मनाएका छन् ।

अँग्रेजी पात्रोको नयाँ वर्ष २०२० तथा नेपालीहरुको पर्व मकर सँक्रान्तिको अवसरमा मधेशीहरुको छाता संगठन गैर आवासीय मधेशी संघ, युएईले दुबईका जबिल पार्कमा मधेशी मिलन समारोहको आयोजना गर्दै मधेशी मिलन गरेका हुन् ।

शुक्रबार ( ३ जनवरी, २०२०) को मधेशी मिलन समारोहलाई थप स्तरीय र स्मरणीय बनाउको लागि संघसँग आबद्ध मधेशीहरुको लागि वनभोजको आयोजना समेत गरेको थियो । मधेशी युवायुवतिहरुले प्रत्येक वर्ष अँग्रेजी नयाँ वर्षको अवसरमा यस्ता कार्यक्रमको आयोजना गर्दै आएको छ ।

यो पनि पढनुहोस् : दुबईको 'मधेशी मिलन' समारोहमा यसरी झुमे मधेशी मूलका नेपालीहरु

मधेशीहरुको छाता संगठन तथा अभिभावकत्व प्रदान गर्दै आएको गैर आवासीय मधेशी संघले प्रत्येक वर्ष मधेशी मूलका नेपालीहरुसँग आत्मीय बढाउन तथा विदेशमा छरिएर रहेका उनीहरु उपर कुनै प्रकारको समस्या, मधेश विकास लगायतको विषयमा चर्चा समेत गर्ने गरिएको छ । गैर आवासीय मधेशी संघका अन्तराष्ट्रिय अध्यक्ष बसन्त कुमार कुशवाहाले तराई मधेशमा मनाइने विभिन्न उल्लासको पर्व, महोत्सवको अवसर पारेर विदेशमा रहेका मधेशी मूलका नेपालीहरुलाई अपनत्व प्रदान गर्न कार्यक्रहरुको आयोजना गरिदै आएको बताउनुभयो ।

प्रत्येक वर्ष मकर सँक्रान्ती, होली मिलन समारोह जस्ता कार्यक्रम तथा मधेशी समुदायलाई प्रगति, विकास हेतु शुभकामना आदान प्रदान समेत गरिदै आएको छ । विदेशमा रहेर पनि मधेशी समुदायले आफ्नै ठाउँमा रहेको जस्तो महसुस नभएपनि अपनत्वको भाव झल्किने आशयले यी कार्यक्रहरु सहित शुभकामना आदान प्रदान र मधेशी मिलन समारोह गर्दै आएको हो ।

मधेशी मिलन समारोहमा सँस्थासँग आवद्ध पदाधिकारी, मुस्लिम समुदायहरुगरी २०० बढी जनाको उपस्थिति रहेको थियो । कार्यक्रमलाई केही बेर रोमाञ्ति बनाउँदै सहभागीहरुले नाचगानका साथै मनोरञ्जनात्मक कार्यक्रम समेत गरेको थियो ।